(សិង្ហបុរី)៖ ប៉ូលិសនៃប្រទេសសិង្ហបុរី បានឱ្យដឹងនៅថ្ងៃអង្គារនេះថា ប្រជាជនសិង្ហបុរី បានបាត់បង់លុយសរុបចូលគ្នាមានចំនួនរហូតដល់ ១.១ពាន់លានដុល្លារសិង្ហបុរី ស្មើនឹង ៨២២លានដុល្លារអាមេរិក ដោយសារតែអំពើឆបោក កាលពីក្នុងឆ្នាំ២០២៤។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី២៥ ខែកុម្ភៈ ឆ្នាំ២០២៥។

យោងតាមរបាយការណ៍របស់ប៉ូលិសសិង្ហបុរី ទឹកប្រាក់ខាងលើ គឺជាចំនួនដ៏ច្រើនបំផុតក្នុងកំណត់ត្រា ហើយគឺជាការកើនឡើង ៧០.៦ភាគរយ ធៀបនឹងទឹកប្រាក់៦៥១.៨លានដុល្លារសិង្ហបុរី កាលពីក្នុងឆ្នាំ២០២៣ ខណៈតួលេខនៃករណីឆបោក បានកើន​១១ភាគរយ ដល់៥១ ៥០១ករណី។ ២៤.៣ភាគរយ នៃលុយដែលបាត់បង់ទាំងនោះ គឺដោយសារការឆបោក តាមរូបិយបណ្ណឌីជីថល ឬហោថា cryptocurrency ប៉ុន្តែការឆបោក តាមប្រព័ន្ធពាណិជ្ជកម្មអនឡាញ ឬ e-commerce មានចំនួនករណីច្រើនជាងគេ គឺសរុប១១ ៦៦៥ករណី ជាមួយទឹកប្រាក់បាត់បង់ ១៧.៥លានដុល្លារសិង្ហបុរី។

គួរបញ្ជាក់ថា ក្នុងចំណោមលុយដែលបាត់បង់ទាំងអស់ អង្គភាពប្រយុទ្ធប្រឆាំងអំពើឆបោករបស់សិង្ហបុរី យកបានមកវិញប្រមាណ​ជាង ១៨២លានដុល្លារសិង្ហបុរី។ កាលពីខែមករា ឆ្នាំ២០២៥នេះ ប្រទេសសិង្ហបុរី បានអនុម័តច្បាប់ថ្មីមួយ ដែលអនុញ្ញាតឱ្យប៉ូលិស​អាចបង្កកគណនីធនាគារ របស់បុគ្គលទាំងឡាយ ដែលអាចជាជនរងគ្រោះនៃអំពើឆបោក ដើម្បីជួយទប់ស្កាត់ការបាត់បង់ប្រាក់របស់ពួកគេ៕