(មូស្គូ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយថា លោកនឹងផ្តល់ឱកាសឱ្យសហរដ្ឋអាមេរិក ចូលរួមក្នុងគម្រោងរកស៉ីរ៉ែកម្ររបស់រុស្ស៉ី ក៏ដូចជាការផ្គត់ផ្គង់អាលុយមីញ៉ូមដល់ទីផ្សារក្នុងស្រុករបស់សហរដ្ឋអាមេរិក ក្រោមកិច្ចព្រមព្រៀងសេដ្ឋកិច្ចនាពេលអនាគត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៥ ខែកុម្ភៈ ឆ្នាំ ២០២៥។

ថ្លែងតាមកញ្ចក់ទូរទស្សន៍ លោក ពូទីន គូសបញ្ជាក់ថា «ដោយវិធីនេះ ពួកយើងត្រៀមខ្លួនជាស្រេចក្នុងការផ្តល់ជូន នូវគម្រោងរួមគ្នាជាមួយដៃគូអាមេរិក ហើយនៅពេលខ្ញុំហៅថាជាដៃគូ ន័យថាមិនត្រឹមតែរចនាសម្ព័ន្ធរដ្ឋបាល និងរដ្ឋាភិបាលប៉ុណ្ណោះទេ ប៉ុន្តែថែមទាំងក្រុមហ៊ុនផងដែរ ប្រសិនបើពួកគេចាប់អារម្មណ៍ធ្វើការរួមគ្នា»។ លោក ពូទីន បន្ថែមថា «ខ្ញុំចង់សង្កត់ធ្ងន់ថា ធនធានប្រភេទនេះយើងមានច្រើនជាងអ៊ុយក្រែន។ កិច្ច​ព្រម​ព្រៀង​ដ៏​មាន​សក្ដានុពល​រវាង​សហរដ្ឋ​អាមេរិក និង​អ៊ុយក្រែន ​ពាក់​ព័ន្ធ​នឹងរ៉ែកម្រ មិន​ជា​ក្តីកង្វល់​សម្រាប់​រុស្ស៉ីឡើយ»។

គួរបញ្ជាក់ថា រុស្ស៉ី គឺជាប្រទេសធំជាងគេទី ៥ក្នុងពិភពលោក ដែលមានរ៉ែកម្រដ៏សម្បើម បន្ទាប់មកគឺ ចិន ប្រេស៉ីល ឥណ្ឌា និងអូស្រ្តាលី។ តាមការប៉ាន់ស្មាន រុស្ស៉ីអាចមានរ៉ែកម្រប្រហែល ៣.៨លានតោន៕