(ប្រ៊ុចសែល)៖ ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas បានបញ្ជាក់កាលពីថ្ងៃចន្ទថា អឺរ៉ុបនិងសហរដ្ឋអាមេរិក នឹងអាចដោះស្រាយការខ្វែងគំនិគ្នារបស់ពួកគេបាន ដូចដែលធ្លាប់បានធ្វើក្នុងអតីតកាល បើទោះជាមានសេចក្តីថ្លែងការណ៍ថ្មីៗ នេះពីរដ្ឋបាលសហរដ្ឋអាមេរិក ដែលបានបង្កឱ្យមានការព្រួយបារម្ភក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី២៤ ខែកុម្ភៈ ឆ្នាំ២០២៥។
លោកស្រី Kallas បានថ្លែង បន្ទាប់ពីកិច្ចប្រជុំរដ្ឋមន្ត្រីការបរទេសសហភាពអឺរ៉ុបនៅទីក្រុងប្រ៊ុចសែលថា «វាច្បាស់ណាស់ថា សេចក្តីថ្លែងការណ៍ដែលចេញពីសហរដ្ឋអាមេរិក ធ្វើឱ្យយើងទាំងអស់គ្នាព្រួយបារម្ភ...យើងធ្លាប់មានភាពខុសគ្នាពីមុនមក ប៉ុន្តែយើងតែងតែគ្រប់គ្រងហើយដោះស្រាយវាចេញ ហើយយើងក៏រំពឹងថានឹងធ្វើដូច្នេះនៅពេលនេះដែរ។ យើងកំពុង តែឈានទៅរកទំនាក់ទំនងជាមួយរដ្ឋបាលអាមេរិកថ្មី»៕
