(ហ៊្សេរុយសាឡិម)៖​ ក្រោយត្រឡប់ពីទីក្រុងវ៉ាស៉ីនតោនទៅដល់អ៉ីស្រាអែលវិញ​ លោកនាយករដ្ឋមន្ត្រី Benjamin Netanyahu បានកោតសរសើរផែនការបស់ប្រធានាធិបតី លោក​ ដូណាល់​ ត្រាំ​ ដែលចង់ឱ្យសហរដ្ឋអាមេរិក​គ្រប់គ្រងលើតំបន់ហ្កាហ្សា និងការផ្លាស់ទីលំនៅប្រជាជនប៉ាឡេស្ទីនចេញពីតំបន់​។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃចន្ទ​ ទី១០​ ខែកុម្ភៈ​ ឆ្នាំ​ ២០២៥។

លោក​ Netanyahu បានប្រាប់គណៈរដ្ឋមន្ត្រីរបស់លោកថា សម្ព័ន្ធមិត្តទាំងពីរបានព្រមព្រៀងគ្នាលើគោលដៅសង្គ្រាមដែលកំណត់ដោយអ៉ីស្រាអែល​ នៅពេលចាប់ផ្តើមសង្រ្គាមរយៈពេល ១៥ខែរបស់ខ្លួនប្រឆាំងក្រុមហាម៉ាស រួមទាំងការធានាថាហ្កាហ្សាលែងជាគំរាមកំហែងដល់អ៉ីស្រាអែលទៀត។

ដោយសំដៅលេីផែនការគ្រប់គ្រងតំបន់ហ្កាហ្សា​ លោក​ Netanyahu​ គូសបញ្ជាក់ថា​ «​លោកប្រធានាធិបតី ត្រាំ​ បានមកជាមួយនិងចក្ខុវិស័យខុសប្លែកគ្នាទាំងស្រុង និងប្រសើរជាងមុនសម្រាប់អ៉ីស្រាអែល ដែលជាវិធីសាស្រ្តបដិវត្តន៍ប្រកបដោយភាពច្នៃប្រឌិត ហេីយដែលយើងកំពុងពិភាក្សានាពេលនេះ។​ គាត់​ (លោក​ ត្រាំ)​ មានការតាំងចិត្តយ៉ាងខ្លាំងក្នុងការអនុវត្តផែនការនោះ​ ហើយខ្ញុំជឿថាវាបើកឱកាសច្រើនសម្រាប់ពួកយើង»។

គួរបញ្ជាក់ថា​ ទោះបីជាមានការរិះគន់ពីសម្ព័ន្ធមិត្តអន្តរជាតិ និងរដ្ឋអារ៉ាប់ជាពិសេសក៏ដោយ ថ្មីៗនេះលោក ត្រាំ​ បានបញ្ចេញផែនការទ្វេដងដោយនិយាយថា អ៉ីស្រាអែលនឹងប្រគល់តំបន់ហ្កាហ្សាមកឱ្យសហរដ្ឋអាមេរិក​ ក្រោយសង្រ្គាមបិទបញ្ចប់៕