(ម៉ូស្គូ)៖ ក្រសួងការបរទេសរុស្ស៊ីបានបញ្ជាក់ កាលពីថ្ងៃព្រហស្បតិ៍ថា សហរដ្ឋអាមេរិក ចាំបាច់ត្រូវកំណត់គោលនយោបាយរបស់ខ្លួន ឱ្យបានច្បាស់លាស់ ស្តីពីការបញ្ចប់ជម្លោះនៅអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រសួងបានបញ្ជាក់ថា ទីក្រុងម៉ូស្គូត្រៀមខ្លួនជាស្រេច ក្នុងការវាយតម្លៃជំហររបស់អាមេរិកដោយ ផ្អែកលើសកម្មភាពជាក់ស្តែង ជាជាងវោហាសាស្ត្រពីសំណាក់រដ្ឋបាលថ្មីរបស់អាមេរិក។

ទីភ្នាក់ងារសារព័ត៌មានរដ្ឋ RIA របស់រុស្ស៊ីបានដកស្រង់សម្តី សមាជិកសភាជាន់ខ្ពស់ម្នាក់ ដោយលើកឡើងថា ការត្រៀមរៀបចំសម្រាប់កិច្ចប្រជុំ រវាងលោក ពូទីន និងលោក ត្រាំ កំពុងស្ថិតក្នុង «ដំណាក់កាលជឿនលឿន»។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានថ្លែងថា ទីក្រុង ម៉ូស្គូបានឮសម្តី និងសេចក្តីថ្លែងការណ៍ជាច្រើនពីទីក្រុងវ៉ាស៊ីនតោនស្តីពីអ៊ុយក្រែន។ ប៉ុ​ន្តែសម្រាប់ពេលនេះ មិនទាន់មានភាពច្បាស់លាស់អំពីអ្វីដែលសហរដ្ឋអាមេរិករំពឹងទុក ក្នុងការស្វែងរកកិច្ចព្រមព្រៀងដើម្បីបញ្ចប់ជម្លោះនៅទីនោះ នោះទេ។

គួរបញ្ជាក់ថា បើទោះបីជា មានការលើកឡើងពីលទ្ធភាពនៃកិច្ចប្រជុំរវាងប្រធានាធិបតីអាមេរិកលោក ដូណាល់ ត្រាំ និងប្រធានាធិបតី រុស្ស៊ី លោក វ្ល៉ាឌីមៀ ពូទីន ក៏ដោយ ក៏មិនទាន់មានការសន្ទនាតាមទូរសព្ទរវាងមេដឹកនាំទាំងពីរនៅឡើយទេ ចាប់តាំងពីលោក ត្រាំ ចូលកាន់តំណែង នេះបើតាមការបញ្ជាក់ជាសាធារណៈរបស់មន្ត្រីនៃភាគីទាំងសងខាង៕