(ប៉េកាំង)៖ នាថ្ងៃព្រហស្បតិ៍ ទី៦ ខែកុម្ភៈ ប្រធានាធិបតីចិន លោក ស៉ី ជីនពីង បានទទួលជួបនាយករដ្ឋមន្រ្តីថៃ លោកស្រី ផែថងថាន ស៉ីណាវ៉ាត់ ស្របពេលដែលប្រទេសទាំងពីរ សម្លឹងរកការរឹតបន្តឹងចំណងទាក់ទង ចំពោះមុខភាពមិននឹងនរកាន់តែខ្លាំងឡើង នៃស្ថានការណ៍ពិភពលោក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោកស្រី ផែថងថាន កំពុងបំពេញដំណើរបំពេញទស្សនកិច្ចផ្លូវការ នៅប្រទេសចិន ចាប់ពីថ្ងៃទី៥ ដល់ទី៨ ខែកុម្ភៈ ដែលនេះគឺជា​ទស្សនកិច្ចលើកដំបូង របស់មកកាន់ទីក្រុងប៉េកាំង គិតចាប់តាំងពីលោកស្រី បានចូលកាន់តំណែង កាលពីខែសីហា ឆ្នាំ២០២៤។ ទស្សនកិច្ចដែលមានរយៈពេល៤ថ្ងៃនេះ គឺធ្វើឡើងចំខួបទី៥០ នៃទំនាក់ទំនងការទូតចិន-ថៃ ដែលបច្ចុប្បន្ន កំពុងស្ថិតក្រោមស្រមោល នៃបញ្ហាមួយចំនួនដូចជា សកម្មភាពឆបោកតាមប្រព័ន្ធអនឡាញ និងក្តីកង្វល់អំពីសុវត្ថិភាព។

ករណីតារាសម្តែងចិនម្នាក់ ដែលបានធ្វើដំណើរទៅប្រទេសថៃ ហើយត្រូវបានគេបោកបញ្ឆោត នាំឆ្លងចូលទៅប្រទេសមីយ៉ាន់ម៉ា ប៉ុន្តែក្រោយមក ក៏ត្រូវបានជួយសង្រ្គោះវិញនោះ បានបង្កឱ្យមានការជជែកដេញដោលយ៉ាងក្តៅគគុក នៅក្នុងប្រទេសចិន ជុំវិញបញ្ហាឧក្រិដ្ឋកម្មឆបោកឆ្លងព្រំដែន។ ថៃ ដែលបារម្ភអំពីផលប៉ះពាល់លើវិស័យទេសចរណ៍ដ៏សំខាន់របស់ខ្លួន បានព្យាយាមរំងាប់ក្តីកង្វល់អំពីបញ្ហាសុវត្ថិភាព ក្នុងចំណោមជនជាតិចិន ជាក្រុមភ្ញៀវទេសចរធំជាងគេបង្អស់ ដែលមកទស្សនាប្រទេសថៃ។ កាលពីថ្ងៃពុធសប្តាហ៍នេះ ថៃបានកាត់ផ្តាច់ ការផ្គត់ផ្គង់អគ្គិសនី អ៉ីនធើណិត និងឥន្ធនៈ ទៅកាន់តំបន់ព្រំដែនមួយចំនួន ក្នុងប្រទេសមីយ៉ាន់ម៉ា ដើម្បីព្យាយាមទប់ស្កាត់សកម្មភាពឧក្រិដ្ឋកម្មឆបោក។

គួរបញ្ជាក់ថា ជំនួបពិភាក្សារវាងលោក ស៉ី និងលោកស្រី ផែថងថាន ក៏កើតមានឡើង ស្របពេលទីក្រុងប៉េកាំង កំពុងហែលឆ្លង​សង្រ្គាមពាណិជ្ជកម្មថ្មី ជាមួយសហរដ្ឋអាមេរិក ផងដែរ។ កាលពីខែវិច្ឆិកា ឆ្នាំ២០២៤ រដ្ឋមន្រ្តីពាណិជ្ជកម្មថៃ ធ្លាប់បានលើកឡើងថា ប្រទេសអាស៊ានមួយនេះ មានតុល្យភាពល្អរវាងអាមេរិកនិងចិន ហើយរំពឹងទទួលបានផលចំណេញ ពីសង្រ្គាមពាណិជ្ជកម្មរវាង​ប្រទេសមហាអំណាចទាំងពីរ ដ្បិតការនាំចេញរបស់ថៃទៅកាន់អាមេរិក មុខជានឹងកើនឡើង ដោយសារអាមេរិក នឹងកាត់បន្ថយ​ការនាំចូលពីចិន៕