(កៀវ)៖​ ក្រុមមន្ត្រីអ៊ុយក្រែននិយាយថា រុស្ស៉ីបានបាញ់បង្ហោះយន្តហោះដ្រូន​ និងមីស៉ីល​មកលើអ៊ុយក្រែន​ នាថ្ងៃសៅរ៍នេះ​ បណ្តាលឱ្យមនុស្ស ៨នាក់ស្លាប់​ និងបំផ្លាញអគារលំនៅដ្ឋានច្រេីនខ្នង ព្រមទាំងហេដ្ឋារចនាសម្ព័ន្ធថាមពលនៅទូទាំងប្រទេស។​ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃសៅរ៍​ ទី១​ ខែកុុម្ភៈ​ ឆ្នាំ​ ២០២៥។

ក្រសួងមហាផ្ទៃអ៊ុយក្រែន​ បានឱ្យដឹងថា មីស៉ីលរុស្ស៉ីវាយប្រហារត្រូវអគារលំនៅដ្ឋានមួយ​ នៅកណ្តាលទីក្រុង Poltava សម្លាប់មនុស្ស​ ៤នាក់ និងរបួស ១៣នាក់។ ក្រសួងបានភ្ជាប់មកជាមួយរូបភាព​ ដែលបង្ហាញពីអគារច្រេីនជាន់ត្រូវខ្ទេច ខណៈអ្នកពន្លត់អគ្គីភ័យ និងអ្នកជួយសង្គ្រោះកំពុងស្វែងរកមនុស្សតាមគំនរបាក់បែក។

អភិបាលក្រុង Kharkov និយាយថា មនុស្សម្នាក់បានស្លាប់ និង​ ៤នាក់របួសនៅភាគឦសាន​ក្រុង ក្នុងការវាយប្រហារដោយដ្រូន។​ មន្ត្រីក្នុងតំបន់និយាយថា ប៉ូលិស​ ៣នាក់ត្រូវបានសម្លាប់​អំឡុងពេលនៃការវាយប្រហារនេះ ខណៈដែលពួកគេដើរល្បាតតាមដងផ្លូវ​ នៅក្នុងភូមិមួយនៃតំបន់ភាគឦសានទីក្រុង Sumy។

នៅឯទីក្រុង Poltava ដែលជាទីក្រុងតូចមួយនៅចម្ងាយប្រហែល ១២០គីឡូម៉ែត្រពីព្រំដែនរុស្ស៉ី​ អគារផ្ទះល្វែងប្រហែល ១៨អគារ សាលាមត្តេយ្យមួយ និងហេដ្ឋារចនាសម្ព័ន្ធថាមពល​ បានរងការខូចខាត។​ ការខូចខាតក៏ត្រូវបានកត់ត្រាផងដែរ​ នៅក្នុងទីក្រុង Zaporizhzhia ភាគអាគ្នេយ៍តំបន់ Kharkiv តំបន់​ Sumy នៅភាគឦសាន និងតំបន់ Khmelnytskyi នៅភាគខាងលិច។

ប្រធានាធិបតីអ៊ុយក្រែន​ លោក​ វ៉ូឡូឌីមៀ​ ហ្សេលេនស្គី​ បញ្ជាក់ថា​ «​រុស្ស៉ីបានវាយប្រហារទីក្រុងរបស់យើង ដោយប្រើអាវុធប្រភេទផ្សេងៗគ្នាដូចជា​ មីស៉ីល​ ដ្រូនយន្តហោះ​ និងគ្រាប់បែកពីលើអាកាស។ រាល់ការវាយប្រហារភេរវករបែបនេះបង្ហាញឱ្យឃើញថា យើងត្រូវការការគាំទ្របន្ថែមទៀត។ ប្រព័ន្ធការពារដែនអាកាស អាវុធប្រឆាំងមីស៉ីល​ អាចជួយសង្គ្រោះជីវិតមនុស្ស»។

ក្រសួងការពារជាតិរុស្ស៉ី​ បានទទួលស្គាល់ថា កងកម្លាំងរបស់ខ្លួនបានបើកការវាយប្រហារសំដៅទៅលើឧស្ម័ន និងហេដ្ឋារចនាសម្ព័ន្ធថាមពលផ្សេងទៀតរបស់អ៊ុយក្រែន ហើយបានបាញ់ទម្លាក់ដ្រូនអ៊ុយក្រែនចំនួន ១០៨គ្រឿងក្នុងរយៈពេល ២៤ម៉ោងចុងក្រោយនេះ៕