(​វ៉ាស៊ីនតោន)៖ វាអាចជារឿងមួយគួរឱ្យភ្ញាក់ផ្អើល ដែលបុរសអាមេរិកស្បែកខ្មៅវ័យក្មេងម្នាក់ ឈ្មោះថា Danney Williams បានអះអាងថាខ្លួនគឺជាកូនប្រុសលួចលាក់ របស់លោក បៀល គ្លីនតុន​ ដែលត្រូវជាស្វាមី របស់បេក្ខភាពប្រធានាធិបតីអាមេរិក នៃគណបក្សប្រជាធិបតេយ្យ លោកស្រី ហ៊ីលឡារី គ្លីនតុន។ មិនតែប៉ុណ្ណោះបុរសរូបនេះ ថែមទំាងបានព្រមានថានឹងដាក់ពាក្យបណ្តឹង ទៅកាន់តុលាការបើសិនជា អតីតប្រធានាធិបតីអាមេរិកលោក បៀល បដិសេធក្នុងការធ្វើតេស្ដ DNA រកការពិតនោះ​។ នេះបើយោងតាម ការចុះផ្សាយរបស់សារព័ត៌មានរុស្ស៊ី Sputnik នៅល្ងាចថ្ងៃព្រហស្បតិ៍ ទី២០ ខែតុលា ឆ្នាំ២០១៦។

​ថ្លែងទៅកាន់អ្នកសារព័ត៌មានក្នុងទីក្រុង Las Vigas ជាទីដែលលោក បៀល គ្លីនតុន បានចូលរួមគាំទ្រ លោកស្រី គ្លីនតុន នៅក្នុងវេទិកាតស៊ូមតិលើកចុងក្រោយជាមួយ លោក ដូណាល់ ត្រាំ នោះលោក Danney Williams បាននិយាយថា «ខ្ញុំពិតជាចង់ដឹងណាស់ថាតើគាត់ (លោក បៀល) ជាឪពុករបស់ខ្ញុំឬក៏មិនមែន ព្រោះថាខ្ញុំពិតជាចង់ចាប់ដៃគាត់​ និងទទួលស្គាល់គាត់ជាឪពុក»។ Danney Williams បានបន្ថែមថា ប្រាក់សម្រាប់ធ្វើដំណើរមកកាន់ទីក្រុង Las Vigas គឺបានមកពីការរៃអង្គាសពីមិត្តភក្តិរបស់ខ្លួន។

គួរបញ្ជាក់ថា កាលពីសប្ដាហ៍មុន ប្រព័ន្ធផ្សព្វផ្សាយអាមេរិកជាច្រើន បាននំាគ្នាចុះផ្សាយថា អតីតប្រធានាធិបតី អាមេរិក លោក បៀល គ្លីនតុន ធ្លាប់មានកូនប្រុសលួចលាក់ ជាមួយស្រ្ដីរកស៊ីផ្លូវភេទម្នាក់ នៅអំឡុងពេលលោកកាន់ដំណែងជាអភិបាលរដ្ឋ Arkansas៕