(​វ៉ាស៊ីនតោន)៖ លោកស្រី ហ៊ីលឡារី គ្លីនតុន និង លោក ដូណាល់ ត្រាំ បានចាប់ផ្តើមជជែក និងដេញដោលគ្នាជុំទីបី ជាលើកចុងក្រោយនៅល្ងាចថ្ងៃពុធនេះ (ម៉ោងនៅសហរដ្ឋអាមេរិក) ខណៈសល់តែជាង២០ថ្ងៃទៀតការប៉ុណ្ណោះ ការបោះឆ្នោតជ្រើសរើសប្រធានាធិបតីអាមេរិក នឹងឈានចូលមកដល់ ខណៈលោកស្រី គ្លីនតុន ត្រូវបានគេមើលឃើញថា បានប្រាសចាកប្រធានបទបន្តិច។ នេះបើយោងតាមការចុះផ្សាយ​របស់ស្ថានីយ៍ទូរទស្សន៍ CNN​ នាព្រឹកថ្ងៃព្រហស្បតិ៍ ទី២០ ខែតុលា ឆ្នាំ២០១៦។

ក្នុងវេទិកាតស៊ូមតិមានរយៈពេលជាង៩០នាទី បេក្ខភាពប្រធានាធិបតីទំាងពីរ បានដេញដោលគ្នា លើប្រធានបទសំខាន់ៗដូចជា បញ្ហាជនភៀសខ្លួន, បំណុលសាធារណៈ, សេវាសង្គម, សេដ្ឋកិច្ច, តុលាការកំពូល, ស្ថានភាពពិភពលោកបច្ចុប្បន្ន ​និងសមត្ថភាពក្នុងការបំពេញតួនាទីជាប្រធានាធិបតីអាមេរិក។

ក៏ប៉ុន្តែអ្វីដែលគួរឱ្យកត់សម្គាល់គឺថា លោកស្រី គ្លីនតុន បានយករឿងទំនាក់ទំនងជាមួយលោក ពូទីន និងរឿងអាស្រូវផ្លូវភេទ រួមទំាងការប្រើពាក្យសម្ដី មិនសមរម្យលើស្រី្ត មកវាយប្រហារលើលោក ត្រាំ ​តែលោក ត្រាំ បានបដិសេធ និងចោទលោកស្រី គ្លីនតុន ថាជាមនុស្សមិនគួរឱ្យគោរព។  

គួរបញ្ជាក់ថា យោងតាមការស្ទង់មតិកាលពីពេលថ្មីៗនេះ លោកស្រី គ្លីនតុន បានទទួលសម្លេង គាំទ្រ ៤៧% ទល់នឹង ៣៨% របស់លោក ត្រាំ ដែលកំពុងរងការរិះគន់យ៉ាងខ្លំាង ជុំវិញការប្រើពាក្យសម្ដីប្រមាថទៅលើស្រ្តី រហូតដល់មានថ្នាក់ដឹកនំា នៃគណបក្សសាធារណៈរដ្ឋមួយចំនួន ចេញមុខប្រឆាំង និងទាមទារឱ្យលោកដកខ្លួនពីការប្រកួតប្រជែង។ ប៉ុន្តែទោះបីជាយ៉ាងនេះក្ដី អ្នកជំនាញពីររូបគឺលោក Jill Stein et លោក Gary Jonhson បានកត់សម្គាល់ថា បេក្ខជនប្រធានាធិបតីទំាងពីរ អាចនឹងទទួលបានការគាំទ្រតិចជាងប្រធានាធិបតីមុនៗ៕