(វ៉ាស៉ីនតោន)៖ កាលពីថ្ងៃពុធ ទី១៥ ខែមករា សហរដ្ឋអាមេរិក បានដាក់ទណ្ឌកម្មរាប់រយបន្ថែមទៀត ដែលមានគោលដៅប្រឆាំងនឹង​រុស្ស៉ី ដើម្បីព្យាយាមបង្កើនសម្ពាធលើទីក្រុងមូស្គូ មុនប្រធានាធិបតីអាមេរិក លោក ចូ បៃដិន ត្រូវចាកចេញពីតំណែង ហើយលោក ដូណាល់ ត្រាំ នឹងឡើងមកកាន់អំណាចបន្ត នៅប៉ុន្មានថ្ងៃខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី១៦ ខែមករា ឆ្នាំ២០២៥។

ក្នុងចំណាត់ការជុំថ្មីខាងលើ ក្រសួងការបរទេស រួមទាំងក្រសួងហិរញ្ញវត្ថុអាមេរិក បានប្រកាសដាក់ទណ្ឌកម្ម លើគោលដៅសរុបជាង២៥០គោលដៅ ក្នុងនោះមានខ្លះស្ថិតនៅប្រទេសចិន ហើយវាមានគោលដៅចម្បងផ្តោតលើ ការគេចវេះទណ្ឌកម្មរបស់រុស្ស៉ី និងឧស្សាហកម្មយោធា​របស់រុស្ស៉ី។ ក្នុងចំណោមនោះ អង្គភាពសំខាន់ៗជិត១០០របស់រុស្ស៉ី រួមមានទាំងធនាគារ និងក្រុមហ៊ុនធ្វើប្រតិបត្តិការ ក្នុងវិស័យថាមពល ដែលកន្លងមកត្រូវបានដាក់ទណ្ឌកម្មរួចហើយនោះ គឺត្រូវទទួលរងការរឹតត្បិតថ្មីៗបន្ថែមទៀត។

គួរបញ្ជាក់ថា វាមិនទាន់ច្បាស់នោះទេថា តើលោក ដូណាល់ ត្រាំ នឹងធ្វើបែបណាពាក់ព័ន្ធ បញ្ហានៃការដាក់ទណ្ឌកម្មរបស់អាមេរិកលើរុស្ស៉ី ជុំវិញសង្រ្គាមអ៊ុយក្រែន។ កាលពីមុន លោក ត្រាំ ធ្លាប់ប្រកាន់ជំហររាក់ទាក់ចំពោះ ប្រធានាធិបតីរុស្ស៉ី លោក វ៉្លាឌីមៀ ពូទីន ហើយក្នុងសប្តាហ៍នេះ លោកបាននិយាយថា រូបលោកនឹងព្យាយាមជួបលោក ពូទីន ឱ្យបានឆាប់ ដើម្បីពិភាក្សាគ្នាអំពី​បញ្ហាអ៊ុយក្រែន៕