(ប៉េកាំង)៖ ប្រធានាធិបតីហ្វីលីពីន លោក Rodrigo Duterte នៅល្ងាចថ្ងៃអង្គារនេះបានធ្វើដំណើរទៅដល់ទីក្រុងប៉េកាំង ប្រទេសចិនហើយ ដោយនេះគឺជាការចាប់ផ្តើមដំណើរទស្សនកិច្ចផ្លូវការ រយៈពេល០៤ថ្ងៃ​ ទៅកាន់ប្រទេសចិន នេះបើតាមសារព័ត៌មានស៊ិនហួ ចេញផ្សាយនាយប់ថ្ងៃទី១៨ ខែតុលា ឆ្នាំ២០១៦នេះ។

ការជ្រើសរើសប្រទេសចិន ជាប្រទេសទីមួយ នៃដំណើរទស្សនកិច្ចនៅក្រៅតំបន់អាស៊ាន គឺជាដំណើរទស្សនកិច្ចលើកដំបូង របស់លោក Duterte​ ចាប់តាំងពីលោក បានឡើងកាន់តំណែងនៅក្នុងខែមិថុនា ហើយដំណើរទស្សនកិច្ចនេះបានធ្វើឡើង ខណៈមានការធ្លាក់ចុះទំនាក់ទំនងរវាងចិន-ហ្វីលីពីន ដោយសារបញ្ហាសមុទ្រចិនភាគខាងត្បូង។

​លោកប្រធានាធិបតី Duterte នឹងជួបជាមួយសមភាគីរបស់លោក គឺលោកប្រធានាធិបតីចិន Xi Jinping, នាយករដ្ឋមន្ត្រីចិន លោក Li Keqiang និងសមាជិកសភាជាន់ខ្ពស់ចិន លោក Zhang Dejiang ផងដែរ នេះបើតាមការបញ្ជាក់ពីក្រសួងការបរទេសចិន។

«នេះគឺជាដំណើរទស្សនៈកិច្ចប្រវត្តិសាស្ត្រ និងបង្ហាញពីឱកាសមួយសម្រាប់ទំនាក់ទំនងរវាងចិន និងហ្វីលីពីន ដើម្បីចាប់ផ្តើមឡើងវិញ នូវភាពស្រុះស្រួលគ្នា ព្រមទាំងមានជំហរវិជ្ជមានបន្ថែមទៀត» នេះបើតាមសម្តីលោក Wang Yi រដ្ឋមន្ត្រីការបរទេសចិន បានឲ្យដឹងយ៉ាងដូច្នេះ។
​
លោក Ruan Zongze អនុប្រធានប្រតិបត្តិស្ថាប័នសិក្សាអន្តរជាតិចិន បានឲ្យដឹងថា កិច្ចប្រជុំដែលនឹងធ្វើឡើង នៅពេលខាងមុខឆាប់ៗនេះ ត្រូវបានគេរំពឹងថា នឹងធ្វើឡើងដើម្បីពង្រឹងកិច្ចសហប្រតិបត្តិការពាណិជ្ជកម្ម, ហេដ្ឋារចនាសម្ព័ន្ធ និងការគ្រប់គ្រងគ្រឿងញៀនផងដែរ»៕