(កៀវ)៖ អាជ្ញាធរនៅអ៊ុយក្រែន បាននិយាយថា នៅថ្ងៃពុធនេះ រុស្ស៉ីបានបើកការវាយប្រហារ ក្នុងទ្រង់ទ្រាយធំសាជាថ្មីម្តងទៀត មកលើ​ប្រព័ន្ធថាមពល ក៏ដូចជាទីក្រុងនានារបស់អ៊ុយក្រែន នៅតំបន់ភាគខាងកើត ដោយប្រើប្រាស់មីស៉ីលគ្រូស និងមីស៉ីលបាលិស្ទីគ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី២៥ ខែធ្នូ ឆ្នាំ២០២៤។

មនុស្សយ៉ាងហោច៣នាក់ បានរងរបួស ក្នុងការវាយប្រហារមីស៉ីល លើតំបន់ Kharkiv នៅភាគឦសានអ៊ុយក្រែន។ កងកម្លាំង​ទ័ពអាកាសរបស់អ៊ុយក្រែន បាននិយាយថា តំបន់ Kharkiv ត្រូវបានវាយប្រហារដោយមីស៉ីលបាលិស្ទីគ ហើយអគារមួយចំនួន បានរងការខូចខាត។ អាជ្ញាធរនៅតំបន់ Dnipro ក៏បានរាយការណ៍ អំពីការវាយប្រហាររបស់រុស្ស៉ី ផងដែរ។ រីឯរដ្ឋមន្រ្តីថាមពលអ៊ុយក្រែន បាននិយាយថា រុស្ស៉ីបានបើកការវាយប្រហារទ្រង់ទ្រាយធំថ្មីទៀត មកលើវិស័យថាមពលរបស់អ៊ុយក្រែន ជាហេតុ​បង្ខំឱ្យប្រតិបត្តិករប្រព័ន្ធថាមពល រឹតត្បិតការផ្គត់ផ្គង់អគ្គិសនី ដើម្បីកាត់បន្ថយផលប៉ះពាល់។

គួរបញ្ជាក់ថា អំឡុងការវាយប្រហារមីស៉ីលទ្រង់ទ្រាយធំកន្លងមក កាលពីថ្ងៃទី១៧ ខែវិច្ឆិកា រុស្ស៉ីបានបាញ់មីស៉ីលចំនួន១២០គ្រាប់ និង​ដ្រូន៩០គ្រឿង លើអ៊ុយក្រែន ដោយបានសម្លាប់មនុស្ស យ៉ាងហោច៧នាក់ ហើយបង្កការខូចខាតធ្ងន់ធ្ងរ ចំពោះប្រព័ន្ធថាមពល៕