(អាម៉ាន់)៖ អ្នកការទូតកំពូលៗមកពីសហរដ្ឋអាមេរិក តួកគី សហភាពអឺរ៉ុប និងរដ្ឋអារ៉ាប់បានជួបប្រជុំគ្នា ក្នុងប្រទេសហ៊្សកដានី នៅថ្ងៃសៅរ៍ ទី១៤ ខែធ្នូនេះ សម្រាប់កិច្ចពិភាក្សាស្តីពីស៉ីរី ខណៈដែលមហាអំណាចក្នុងតំបន់ និងពិភពលោកកំពុងដណ្តើមឥទ្ធិពលគ្នាលើរដ្ឋាភិបាលណាដែលនឹងមកជំនួសអតីតប្រធានាធិបតីលោក Bashar al-Assad។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។
លោក បៃដិន បានបញ្ជូនរដ្ឋមន្ត្រីការបរទេស លោក Antony Blinken ទៅកាន់តំបន់មជ្ឈិមក្នុងសប្តាហ៍នេះ ដើម្បីស្វែងរកការគាំទ្រសម្រាប់គោលការណ៍ ដែលទីក្រុងវ៉ាស៉ីនតោនសង្ឃឹមថា នឹងនាំដឹកនាំទៅរកការផ្លាស់ប្តូរនយោបាយស៉ីរី ដូចជាការគោរពចំពោះជនជាតិភាគតិចជាដើម។ ក្រុមអ្នកការទូតអារ៉ាប់ ប្រាប់ Reuters ថា ពួកគេកំពុងស្វែងរកការធានាពីតួកគីលេីគាំទ្រដំណើរការនយោបាយរួមបញ្ចូល ដែលរារាំងការបែងចែកប្រទេសស៉ីរីដោយសារបញ្ហានិកាយសាសនា។
រដ្ឋមន្ត្រីការបរទេសតួកគី លោក Hakan Fidan បាននិយាយថា ស្ថានទូតរបស់ប្រទេសលោក នៅក្នុងរដ្ឋធានីដាម៉ាស នឹងចាប់ផ្តើមការងារឡើងវិញពីថ្ងៃសៅរ៍នេះទៅ បន្ទាប់ពីប្រមុខចារកម្មតួកគីបានធ្វើទស្សនកិច្ចទីនោះ នៅសប្តាហ៍នេះ។ ចំណែកហ៊្សកដានី ដែលជាប្រទេសជិតខាងស៉ីរីវិញ ក៏កំពុងរៀបចំការជួបជុំប្រជុំថ្ងៃសៅរ៍នេះ នៅទីក្រុង Aqaba។ ដោយឡែក រុស្ស៉ី និងអ៉ីរ៉ង់ ដែលជាអ្នកគាំទ្រដ៏សំខាន់របស់របបលោក Assad មិនត្រូវបានអញ្ជើញទេ។
គួរបញ្ជាក់ថា លោក Blinken បេសកជនពិសេសរបស់អង្គការសហប្រជាជាតិទទួលបន្ទុកស៉ីរី លោក Geir Pederson ប្រធានគោលនយោបាយការបរទេស EU លោកស្រី Kaja Kallas Fidan និងរដ្ឋមន្ត្រីការបរទេសមកពីហ៊្សកដានី អារ៉ាប៊ីសាអូឌីត អ៉ីរ៉ាក់ លីបង់ អេហ្ស៉ីប អេមីរ៉ាត់អារ៉ាប់រួម បារ៉ែន កាតា បានជួបប្រជុំតុមូលនៅឯអគាររដ្ឋាភិបាលហ៊្សកដានី។ ចំណែកសាមីខ្លួនស៉ីរី មិនមានអ្នកតំណាងណាម្នាក់ត្រូវបានហៅឱ្យមកចូលរួមនោះទេ៕
