(មូស្គូ)៖ បន្ទាប់ពីក្រុមឧទ្ទាមស៊ីរី បានវាយយកទីក្រុងដាម៉ាស (Damascus) និងបង្ខំឱ្យប្រធានាធិបតី Bashar al-Assad ភៀសខ្លួន រុស្ស៊ីបានបង្ហាញការព្រួយបារម្ភ អំពីស្ថានការណ៍នៅស៊ីរី និងសុវត្ថិភាពនៃមូលដ្ឋានទ័ពរបស់ខ្លួន នៅក្នុងប្រទេសនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

ក្រសួងការបរទេសរុស្ស៊ី បានអំពាវនាវឱ្យភាគីទាំងអស់នៅស៊ីរី ជៀសវាងការប្រើប្រាស់អំពើហិង្សា និងដោះស្រាយបញ្ហាតាមរយៈការចរចា។ រុស្ស៊ីក៏បានបញ្ជាក់ថា ខ្លួនកំពុងធ្វើការ ជាមួយក្រុមប្រឆាំងស៊ីរី ដើម្បីស្វែងរកដំណោះស្រាយ។

ក្រសួងការបរទេសរុស្ស៊ី បានប្រកាសថា «យើងជំរុញឱ្យភាគីពាក់ព័ន្ធទាំងអស់ជៀសវាងការប្រើអំពើហិង្សា និងដោះស្រាយបញ្ហាទាំងអស់នៃអភិបាលកិច្ចតាមរយៈមធ្យោបាយនយោបាយ... ក្នុងន័យនេះ សហព័ន្ធរុស្ស៊ីមានទំនាក់ទំនងជាមួយក្រុមប្រឆាំងស៊ីរីទាំងអស់»។

ទោះបីជារុស្ស៊ី បានបញ្ជាក់ថា មូលដ្ឋានទ័ពរបស់ខ្លួននៅស៊ីរី មិនទាន់រងការគំរាមកំហែងធ្ងន់ធ្ងរក៏ដោយ ក៏អ្នកសរសេរប្លុកសង្រ្គាមរុស្ស៊ី បានព្រមានថា មូលដ្ឋានទាំងនោះកំពុងស្ថិតក្នុងស្ថានភាពគ្រោះថ្នាក់។ រុស្ស៊ីក៏បានជំរុញឱ្យពលរដ្ឋរុស្ស៊ី ចាកចេញពីប្រទេសស៊ីរីដើម្បីសុវត្ថិភាព។

គួរបញ្ជាក់ថា ការដួលរលំនៃរដ្ឋាភិបាលលោក Assad បានធ្វើឱ្យរុស្ស៊ីបាត់បង់សម្ព័ន្ធមិត្តដ៏សំខាន់មួយ នៅក្នុងតំបន់មជ្ឈិមបូព៌ា។ រុស្ស៊ី កំពុងព្យាយាមរក្សាឥទ្ធិពលរបស់ខ្លួន នៅក្នុងប្រទេសស៊ីរី ប៉ុន្តែក៏ប្រឈមមុខនឹងបញ្ហាប្រឈមជាច្រើន រួមទាំងការកើនឡើងនៃអំណាចរបស់ក្រុមឧទ្ទាម និងការថយចុះនៃការគាំទ្រពីសំណាក់ប្រជាជនស៊ីរី។

អ្នកវិភាគជឿជាក់ថា រុស្ស៊ី អាចនឹងព្យាយាមចរចាជាមួយក្រុមឧទ្ទាម ដើម្បីរក្សាវត្តមានយោធារបស់ខ្លួននៅក្នុងប្រទេសស៊ីរី។ ប៉ុន្តែ អនាគតនៃមូលដ្ឋានទ័ពរុស្ស៊ីនៅស៊ីរី នៅមិនទាន់ច្បាស់លាស់នៅឡើយទេ៕