(ហ្កាហ្សា)៖ គិតត្រឹមថ្ងៃព្រហស្បតិ៍សប្តាហ៍នេះ កងទ័ពអ៉ីស្រាអែល បានបង្កើនការទម្លាក់គ្រាប់បែក ទូទាំងតំបន់ហ្កាហ្សា ហើយចេញបទបញ្ជាឱ្យជម្លៀសខ្លួនបន្ថែមទៀត ជាហេតុធ្វើឱ្យប្រជាជនត្រូវផ្លាស់ទីលំនៅថ្មី ចេញពីភាគខាងជើង ជាមួយនិងការភ័យខ្លាចគ្រោះថ្នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៨ ខែវិច្ឆិកា ឆ្នាំ ២០២៤។

មន្រ្តីសុខាភិបាលប៉ាឡេស្ទីន បានឱ្យដឹងថា យ៉ាងហោចណាស់មនុស្ស ១០នាក់ត្រូវបានសម្លាប់ និងរបួសមួយចំនួនទៀត នៅក្នុងការវាយប្រហារតាមផ្លូវអាកាសរបស់អ៉ីស្រាអែល លើទីសំណាក់បណ្តោះអាសន្នសម្រាប់ប្រជាជន ក្នុងសាលារៀនមួយ​នៃ​​ជំរំ​ជនភៀសខ្លួន Shati ទីក្រុងហ្កាហ្សា។

យោធា​អ៉ីស្រាអែល​​និយាយ​ថា ការ​វាយ​ប្រហារ​នោះ​ កំណត់​គោល​ដៅ​លើ​ទីបញ្ជាការក្រុម​ហាម៉ាស ​ដែល​បង្កប់​​ក្នុង​បរិវេណ​សាលា។ រថក្រោះអ៉ីស្រាអែល បានរុលចូលទៅទីក្រុង Beit Lahiya ធ្វើឱ្យពលរដ្ឋជាច្រើនគ្រួសារនាំគ្នារត់គេចជាថ្មី ខណៈពួកគេទើបនឹងផ្លាស់ទៅដល់សាលារៀន កន្លែងស្នាក់នៅបណ្តោះអាសន្ន ក្នុងទីក្រុងហ្កាហ្សា ជាមួយនិងសម្ភារៈក៏ដូចជាអាហារមកតាមខ្លួន។

គួរបញ្ជាក់ថា តាមមន្ត្រី​ប៉ាឡេស្ទីន​ អ៉ីស្រាអែល​កំពុង​អនុវត្ត​ផែនការ​បោសសម្អាតផ្តាច់ពូជ។ អ្នកស្រុកនិយាយថា មិនមានជំនួយចូលមកដល់ក្រុង Jabalia, Beit Lahiya ឬ Beit Hanoun ទេ ចាប់តាំងពីអ៉ីស្រាអែលបង្កើន ប្រតិបត្តិការយោធា កាលពីដើមខែមុន។ ជារឿយៗ យោធាអ៉ីស្រាអែលចោទប្រកាន់ក្រុមហាម៉ាស ថាប្រើប្រាស់ហេដ្ឋារចនាសម្ព័ន្ធស៉ីវិល ដើម្បីការពារខ្លួន ប៉ុន្តែក្រុមនេះបានបដិសេធ៕