(វ៉ាស៉ីនតោន)៖ បន្ទាប់ពីលោក ដូណាល់ ត្រាំ ត្រូវបានប្រព័ន្ធផ្សព្វផ្សាយអាមេរិក Fox News ប្រកាសថា ជាអ្នកទទួលជ័យជម្នះ ក្នុងការបោះឆ្នោតប្រធានាធិបតីអាមេរិក អាណត្តិថ្មី ឆ្នាំ២០២៤ បណ្តាមេដឹកនាំពិភពលោក បានចាប់ផ្តើមនាំគ្នាបង្ហោះសារអបអរ​ជាបណ្តើរៗដល់រូបលោក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី៦ ខែវិច្ឆិកា ឆ្នាំ២០២៤។

ប្រធានាធិបតីបារាំង លោក Emmanuel Marcon បាននិយាយថា លោកត្រៀមលក្ខណៈជាស្រេច ដើម្បីធ្វើការជាមួយលោក ត្រាំ ខណៈនាយករដ្ឋមន្រ្តីអ៉ីស្រាអែល លោក Benjamin Netanyahu បាននិយាយថា ជ័យជម្នះរបស់លោក ត្រាំ គឺជាការវិលត្រឡប់​មកវិញដ៏អស្ចារ្យបំផុត ក្នុងឆាកនយោបាយ ហើយជាការវិលត្រឡប់មកវិញ នូវសម្ព័ន្ធភាពកាន់តែរឹងមាំ រវាងអ៉ីស្រាអែលនិងអាមេរិក។ ចំណែក នាយករដ្ឋមន្រ្តីឥណ្ឌា លោក Narendra Modi, នាយករដ្ឋមន្រ្តីអង់គ្លេស លោក Keir Starmer និងប្រមុខអង្គការ NATO លោក Mark Rutte ជាដើម ក៏បានចូលរួមសាទរ លោក ត្រាំ​ ផងដែរ ហើយបណ្តាមេដឹកនាំផ្សេងៗទៀត ក៏ត្រូវគេរំពឹងថា នឹងនាំគ្នាសម្តែង​ការអបអរ ដល់លោក ត្រាំ ដូចគ្នា ជាបន្តបន្ទាប់។

គួរបញ្ជាក់ថា តាមរយៈជ័យជម្នះ ក្នុងការបោះឆ្នោតប្រធានាធិបតីអាមេរិក ឆ្នាំ២០២៤នេះ លោក ត្រាំ នឹងត្រឡប់មកដឹកនាំសហរដ្ឋអាមេរិកសាជាថ្មី សម្រាប់អាណត្តិទី២ បន្ទាប់រូបលោកធ្លាប់កាន់តំណែងជា ប្រធានាធិបតីបានមួយអាណត្តិ កាលពីចន្លោះឆ្នាំ២០១៧ ដល់ឆ្នាំ២០២១៕