(តៃប៉ិ)៖ មន្រ្តីសន្តិសុខជាន់ខ្ពស់មួយរូប របស់កោះតៃវ៉ាន់ បាននិយាយថា សហរដ្ឋអាមេរិកនឹងបន្ត ទំនាក់ទំនងល្អរបស់ខ្លួន ចំពោះតៃវ៉ាន់ នៅបន្ទាប់ពីការបោះឆ្នោត ហើយតៃវ៉ាន់ខ្លួនឯង ក៏នឹងធ្វើការដើម្បីរារាំងចិនពីការបង្កើតបញ្ហាណាមួយ ក្នុងអំឡុងពេលអន្តរកាល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៦ ខែវិច្ឆិកា ឆ្នាំ ២០២៤។
ថ្លែងទៅកាន់អ្នកសារព័ត៌មាន នៅឯសភា ប្រធានការិយាល័យសន្តិសុខជាតិ លោក Tsai Ming-yen បានលើកឡើងថា «ទាក់ទងនឹងច្រកសមុទ្រតៃវ៉ាន់ យើងជឿជាក់ថាសហរដ្ឋអាមេរិក នឹងបន្តវិធីសាស្ត្របច្ចុប្បន្នរបស់ខ្លួន ក្នុងការដាក់កំហិតចិន ហើយនៅតែជាមិត្តជាមួយតៃវ៉ាន់»។
លោកថា តៃវ៉ាន់ នឹងបន្តទំនាក់ទំនងជាមួយរដ្ឋបាលបច្ចុប្បន្ន ដោយផ្តោតលើបញ្ហាសំខាន់ៗ សម្រាប់កិច្ចសហប្រតិបត្តិការ ក្នុងដំណាក់កាលបន្ទាប់ ហើយធ្វើការជាមួយដៃគូអន្តរជាតិ ផ្លាស់ប្តូរព័ត៌មានជុំវិញចេតនា ឬសកម្មភាពយោធាចិន អំឡុងពេលអន្តរកាលនេះ។ ការិយាល័យកិច្ចការតៃវ៉ាន់របស់ចិន មិនទាន់ឆ្លើយតបចំពោះសំណើសុំការអត្ថាធិប្បាយ នៅឡើយទេ។
គួរបញ្ជាក់ថា អំឡុងយុទ្ធនាឃោសនាបោះឆ្នោត លោក ដូណាល់ ត្រាំ ធ្លាប់និយាយថា តៃវ៉ាន់គួរតែបង់ថ្លៃការពារឱ្យអាមេរិក ហើយថែមទាំងបានចោទប្រកាន់កោះនេះ ថាបានលួចអាជីវកម្ម semiconductor របស់សហរដ្ឋអាមេរិកទៀតផង៕
