(វ៉ាស៉ីនតោន)៖ ក្រុមមន្រ្តីនៃក្រសួងការបរទេសអាមេរិក បានកត់ត្រាពីឧប្បត្តិហេតុជិត ៥០០ ដែលអាចបង្កគ្រោះថ្នាក់ដល់ជនស៉ីវិល អំឡុងប្រតិបត្តិការយោធាអ៉ីស្រាអែល ប្រឆាំងក្រុមហាម៉ាស នៅក្នុងតំបន់ហ្កាហ្សា ហើយក៏មាននូវការប្រើប្រាស់អាវុធ ដែលជាជំនួយរបស់សហរដ្ឋអាមេរិកផងដែរ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៣១ ខែតុលា ឆ្នាំ ២០២៤។
ឧប្បត្តិហេតុ ដែលមួយចំនួនអាចបំពានច្បាប់មនុស្សធម៌អន្តរជាតិ ត្រូវបានកត់ត្រា ចាប់តាំងពីថ្ងៃទី៧ ខែតុលា ឆ្នាំ ២០២៣ ជាពេលដែលសង្រ្គាមហ្កាហ្សាផ្ទុះឡើង។ វាត្រូវបានចងក្រង នៅក្នុងរបាយការណ៍ណែនាំ ស្តីពីការឆ្លើយតបគ្រោះថ្នាក់ចំពោះជនស៉ីវិល នៃក្រសួងការបរទេសអាមេរិក ដែលជាយន្តការតាមដាន និងវាយតម្លៃរាល់ការប្រើប្រាស់អាវុធ ដែលមានប្រភពមកពីសហរដ្ឋអាមេរិក ក្នុងផ្លូវខុស។ មន្រ្តីក្រសួងការបរទេសអាមេរិក ប្រមូលយកឧប្បត្តិហេតុទាំងនេះ មកពីប្រភពសាធារណៈ និងមិនមែនសាធារណៈ រួមទាំងសេចក្តីរាយការណ៍ពីប្រព័ន្ធផ្សព្វផ្សាយ ក្រុមសង្គមស៉ីវិល និងក្រុមដែលមានទំនាក់ទំនង ជាមួយរដ្ឋាភិបាលបរទេស។
អតីតមន្ត្រីអាមេរិកម្នាក់ បានប្រាប់ Reuters ថា គ្មានចំណាត់ការណាមួយ ត្រូវបានធ្វើឡើងនៅឡើយទេ។ ជម្រើសចាត់វិធានការអាចមាន រាប់ចាប់ពីការធ្វើការជាមួយរដ្ឋាភិបាលអ៉ីស្រាអែល ដើម្បីជួយកាត់បន្ថយគ្រោះថ្នាក់ រហូតដល់ការព្យួរអាជ្ញាប័ណ្ណនាំចេញអាវុធ ដែលមានស្រាប់ ឬកាត់ចោលនូវការអនុម័តនាពេលអនាគត។
គួរបញ្ជាក់ថា តាមអាជ្ញាធរតំបន់ហ្កាហ្សា សង្រ្គាមរបស់អ៉ីស្រាអែល ប្រឆាំងក្រុមហាម៉ាសនៅទីនោះ បានបណ្តាលឱ្យមនុស្សជាង ៤៣,០០០នាក់ស្លាប់ និងរបួសជាច្រើននាក់៕
