(ភ្នំពេញ)៖ លោក ថេ ឈុន​ហាក់ អគ្គនាយក​នៃ​ការ​អភិវឌ្ឍ​សេដ្ឋកិច្ច​ នៃ​ក្រសួង​កិច្ច​ការ​នារី បានលើកឡើងថា នៅក្នុងសង្គមសេដ្ឋកិច្ចឌីជីថល នាពេលបច្ចុប្បន្ននេះ ការចេះប្រើប្រាស់ប្រព័ន្ធឌីជីថលពីសំណាក់សហគ្រិនស្ត្រី នឹងអាចជួយដល់ដំណើរការអាជីវកម្មរបស់ពួកគាត់ កាន់តែមានការរីកចម្រើន និងមានភាពងាយស្រួល ក្នុងការកំណត់ទីផ្សារគោលដៅ។

ការលើកឡើងបែបនេះ ធ្វើឡើងក្នុងឱកាសដែល លោក ថេ ឈុន​ហាក់ អញ្ជើញចូលរួមកិច្ចពិភាក្សាមួយ ក្រោមប្រធានបទ ស្តីពី «ការ​លើក​កម្ពស់​ ចំណេះដឹង​ហិរញ្ញវត្ថុឌីជីថល សម្រាប់​សហគ្រិនស្រ្តី» ក្នុងកម្មវិធី FRESH BUSINESS។

លោក ថេ ឈុន​ហាក់ បានបញ្ជាក់យ៉ាងដូច្នេះថា «ស្ដ្រីផ្ទាល់ កាលណាគាត់ចាប់យកនូវជំនាញ និងសមត្ថភាពផ្នែកឌីជីថល អាជីវកម្មរបស់គាត់ នឹងផ្ដល់ប្រយោជន៍សំខាន់ រួមមាន៖​ ការបង្ហាញផលិតផល កាន់តែទូលំទូលាយ, កំណត់បាននូវទីផ្សារ, អាចផ្ទេរសមត្ថភាពនៃការលក់ ពីបែបប្រពៃណីឲ្យតាមប្រព័ន្ធអនឡាញ»។

បន្ថែមពីនោះទៀត លោកបានឲ្យដឹងថា នៅក្នុងពេលបច្ចុប្បន្ននេះ ក៏ដូចជានៅក្នុងសង្គមសេដ្ឋកិច្ចឌីជីថល មិនថាអាជីករស្ដ្រី គឺអាជីវករទូទៅ ការយល់ដឹងពីផ្នែកឌីជីថល មានសារៈសំខាន់ ដោយសារកាលណា មានចំណេះដឹងឌីជីថល វាជាផ្នែកមួយសំខាន់ ក្នុងការធ្វើឲ្យការច្នៃប្រឌិតនូវផលិតកម្ម និងការទទួល​បានព័ត៌មានផ្សេងៗពីទីផ្សារ។

លោក ថេ ឈុន​ហាក់ បានបញ្ជាក់ទៀតថា ការយល់ដឹងពីផ្នែកឌីជីថល នឹងជួយឲ្យចេះប្រើប្រាស់ប្រព័ន្ធគ្រប់គ្រងហិរញ្ញវត្ថុ និងចំណូល-ចំណាយ នៅក្នុងអាជីវកម្ម មានភាពងាយស្រួលជាងមុន ហើយមានភាពច្បាស់លាស់ជាងមុនផងដែរ៕

ខាងក្រោមនេះ ជាវីដេអូនៃការលើកឡើង របស់លោក ថេ ឈុន​ហាក់៖