(វ៉ាស៉ីនតោន)៖ ក្រសួងការបរទេសអាមេរិក កាលពីថ្ងៃសៅរ៍សប្តាហ៍នេះ បានទទូចឱ្យពលរដ្ឋអាមេរិកទាំងឡាយ ដែលស្ថិតនៅលីបង់ គួរតែចាកចេញពីប្រទេសនេះ ទាន់នៅមានជម្រើសជើងហោះហើរពាណិជ្ជកម្ម ខណៈជម្លោះរវាងអ៉ីស្រាអែល និងក្រុម Hezbollah បានកើនឡើងកម្តៅខ្លាំង នៅប៉ុន្មានថ្ងៃចុងក្រោយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី២២ ខែកញ្ញា ឆ្នាំ២០២៤។

ទីក្រុងវ៉ាស៉ីនតោន បាននិយាយដូច្នេះថា «ដោយសារតែភាពពិបាកប៉ាន់ស្មាន នៃជម្លោះរវាង Hezbollah និងអ៉ីស្រាអែល បូករួម​ជាមួយហេតុការណ៍ផ្ទុះនាពេលថ្មីៗនេះ នៅពេញប្រទេសលីបង់ ក្នុងនោះមានទាំងនៅរដ្ឋធានី Beirut ស្ថានទូតអាមេរិកសូមទទូច​ឱ្យពលរដ្ឋអាមេរិកទាំងឡាយ ចាកចេញពីលីបង់ ទាន់នៅមានជើងហោះហើរពាណិជ្ជកម្ម។ នាពេលនេះ ជើងហោះហើរពាណិជ្ជកម្ម គឺនៅមាន ប៉ុន្តែត្រូវបានកាត់បន្ថយចំនួន។ ប្រសិនបើស្ថានការណ៍សន្តិសុខកាន់តែអាក្រក់ នោះអាចនឹងលែងមានជម្រើសចាកចេញ តាមរយៈជើងហោះហើរពាណិជ្ជកម្ម តែម្តង»។

កាលពីចុងខែកក្កដា អាមេរិកក៏បានដំឡើងការប្រកាសអាសន្ន ដល់កម្រិតខ្ពស់បំផុតផងដែរ ពាក់ព័ន្ធការធ្វើដំណើរទៅកាន់លីបង់ និងពលរដ្ឋខ្លួនដែលស្ថិតនៅទីនោះ បន្ទាប់ពីការវាយប្រហារមួយរបស់អ៉ីស្រាអែល នៅភាគខាងត្បូងទីក្រុង Beirut បានសម្លាប់​មេបញ្ជាការជាន់ខ្ពស់ម្នាក់របស់ Hezbollah។ រីឯកាលពីថ្ងៃសុក្រសប្តាហ៍នេះ អ៉ីស្រាអែលបានទម្លាក់គ្រាប់បែកលើភាគខាងត្បូង​ទីក្រុង Beirut សាជាថ្មី ហើយអះអាងថា លើកនេះបានផ្តាច់ជីវិតប្រធានកងកម្លាំងពិសេស Radwan របស់ Hezbollah រួមជាមួយមេបញ្ជាការប៉ុន្មាននាក់ទៀត។

ក្រសួងសុខាភិបាលលីបង់ អះអាងថា មនុស្សសរុប៣៧នាក់បានស្លាប់ ក្នុងការវាយប្រហារតាមផ្លូវអាកាសនោះ ហើយវាកើតឡើង ក្រោយករណីផ្ទុះឧបករណ៍ទាក់ទង ប្រើប្រាស់ដោយក្រុម Hezbollah ២ថ្ងៃជាប់គ្នា ដែលបានបង្កឱ្យមានមនុស្សស្លាប់រាប់សិបនាក់ និងរបួសរាប់ពាន់នាក់។ Hezbollah បានចោទថា វាជាស្នាដៃរបស់អ៉ីស្រាអែល។

គួរបញ្ជាក់ថា ក្រុម Hezbollah បានធ្វើសកម្មភាពវាយប្រហារដាក់គ្នាទៅវិញទៅមក​ ជាមួយអ៉ីស្រាអែលអស់រយៈពេលជិត១ឆ្នាំហើយ ដើម្បីគាំទ្រក្រុមហាម៉ាសប៉ាឡេស្ទីន ដែលស្ថិតក្នុងសង្រ្គាមជាមួយអ៉ីស្រាអែល នៅឯតំបន់ហ្កាហ្សា។ ប៉ុន្តែជម្លោះបានកើនឡើងកម្តៅគួរឱ្យកត់សម្គាល់ ក្នុងពេលប៉ុន្មានថ្ងៃចុងក្រោយនេះ ស្របពេលដែលអ៉ីស្រាអែល ហាក់បានងាកទៅផ្តោតការយកចិត្តទុកដាក់របស់ខ្លួន នៅព្រំប្រទល់​ភាគខាងជើង ក្រោយបានធ្វើឱ្យក្រុមហាម៉ាសចុះទន់ខ្សោយខ្លាំង៕