(រីយ៉ាទ)៖ នាយករដ្ឋមន្ត្រីចិន លោក Li Qiang កំពុងស្ថិតនៅក្នុងដំណើរទស្សនកិច្ចនៅតំបន់ឈូងសមុទ្រ ដែលលោកបានជំរុញឱ្យមានការពន្លឿនកិច្ចចរចាពាណិជ្ជកម្មសេរីរវាងចិន និងក្រុមប្រឹក្សាសហប្រតិបត្តិការឈូងសមុទ្រ (GCC)។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters ថ្ងៃទី១១ ខែកញ្ញា ឆ្នាំ២០២៤។

ការអំពាវនាវនេះត្រូវបានធ្វើឡើងក្នុងអំឡុងពេលកិច្ចប្រជុំជាមួយអគ្គលេខាធិការ GCC លោក Jasem al-Budaiwi នៅទីក្រុងរីយ៉ាទ ប្រទេសអារ៉ាប៊ីសាអូឌីត កាលពីថ្ងៃពុធ។

កិច្ចចរចាពាណិជ្ជកម្មសេរីរវាងចិន និង GCC បានចាប់ផ្តើមជិតពីរទសវត្សរ៍មុន ប៉ុន្តែមិនទាន់ទទួលបានផ្លែផ្កានៅឡើយទេ។ មានការជាប់គាំងមួយចំនួនក្នុងការចរចា ដោយសារការព្រួយបារម្ភពីសំណាក់អារ៉ាប៊ីសាអូឌីតអំពីផលប៉ះពាល់ដែលអាចកើតមានពីការនាំចូលទំនិញដែលមានតម្លៃថោកពីប្រទេសចិន។ អារ៉ាប៊ីសាអូឌីតមានការព្រួយបារម្ភថា ការនាំចូលទំនិញថោកទាំងនេះអាចធ្វើឱ្យប៉ះពាល់ដល់ឧស្សាហកម្មក្នុងស្រុក និងផែនការអភិវឌ្ឍន៍ឧស្សាហកម្មរបស់ខ្លួន។

ទោះជាយ៉ាងណាក៏ដោយ ភាគីទាំងពីរហាក់ដូចជាប្តេជ្ញាក្នុងការជំរុញកិច្ចចរចាទៅមុខ។ អគ្គលេខាធិការ GCC បានសង្កត់ធ្ងន់លើសារៈសំខាន់នៃការបញ្ចប់ការចរចា «ក្នុងពេលអនាគតដ៏ខ្លី»។ នេះបង្ហាញពីឆន្ទៈរបស់ GCC ក្នុងការពង្រឹងទំនាក់ទំនងសេដ្ឋកិច្ចជាមួយចិន ដែលជាដៃគូពាណិជ្ជកម្មដ៏សំខាន់របស់ខ្លួន។

ដំណើរទស្សនកិច្ចរបស់លោក Li ទៅកាន់តំបន់ឈូងសមុទ្រ ក៏រួមបញ្ចូលទាំងដំណើរទស្សនកិច្ចទៅកាន់ UAE នៅសប្តាហ៍នេះផងដែរ ដែលបង្ហាញពីការប្តេជ្ញាចិត្តរបស់ចិនក្នុងការពង្រឹងទំនាក់ទំនងជាមួយប្រទេសនៅក្នុងតំបន់នេះ។ ការធ្វើដំណើរនេះកើតឡើងនៅក្នុងបរិបទនៃការកើនឡើងឥទ្ធិពលរបស់ចិននៅក្នុងតំបន់ និងបំណងប្រាថ្នារបស់ខ្លួនក្នុងការពង្រីកកិច្ចសហប្រតិបត្តិការសេដ្ឋកិច្ច និងយុទ្ធសាស្ត្រជាមួយបណ្តាប្រទេសនៅឈូងសមុទ្រ៕