(បាងកក)៖ រដ្ឋាភិបាលថៃ បានឱ្យដឹងនាថ្ងៃពុធនេះថា ទឹកជំនន់និងរអិលបាក់ដី ដែលបង្កឡើងដោយឥទ្ធិពលព្យុះទីហ្វុង Yagi បានផ្តាច់ជីវិតមនុស្ស៤នាក់ នៅភាគខាងជើងប្រទេស និងបង្កការជន់លិចលំនៅដ្ឋានរាប់ពាន់ខ្នង។ នេះបើតាមការចេញផ្សាយ ដោយទីភ្នាក់ងារព័ត៌មាន AFP នាថ្ងៃពុធ ទី១១ ខែកញ្ញា ឆ្នាំ២០២៤។

នាយករដ្ឋមន្រ្តីថៃ អ្នកស្រី Paetongtarn Shinawatra បាននិយាយថា ជំនួយកំពុងតែត្រូវបានដឹកជញ្ជូន ដើម្បីនាំយកទៅឱ្យ​ប្រជាជនប្រមាណ៩,០០០គ្រួសារ រងគ្រោះដោយសារទឹកជំនន់ ក្នុងខេត្ត Chiang Mai និង Chiang Rai នៅភាគខាងជើង។ វាគឺជាករណីមនុស្សស្លាប់ដំបូង ដែលពាក់ព័ន្ធជាមួយព្យុះ Yagi នៅប្រទេសថៃ។ ទន្ទឹមគ្នាដែរ អាជ្ញាធរឧតុនិយមថៃ បានព្រមាន​អំពីការបន្តធ្លាក់ភ្លៀងថែមទៀត រហូតដល់អំឡុងដើមសប្តាហ៍ក្រោយ។ សរុបមកវិញ មនុស្ស២៩នាក់ បានបាត់បង់ជីវិត ដោយសារ​គ្រោះមហន្តរាយធ្លាក់ភ្លៀងខ្លាំង គិតចាប់តាំងពីដើមរដូវភ្លៀង នៅក្នុងប្រទេសអាស៊ានមួយនេះ។

គួរបញ្ជាក់ថា នៅឯប្រទេសវៀតណាមឯណោះវិញ ចំនួនមនុស្សស្លាប់ដោយសារគ្រោះទឹកជំនន់ និងរអិលបាក់ដី បង្កឡើងដោយ ព្យុះ Yagi គឺមកទល់ពេលនេះ បានបន្តកើនដល់១៤៣នាក់ ខណៈតំបន់ភាគខាងជើងវៀតណាម រួមមានទាំងរដ្ឋធានីហាណូយ ត្រូវបានព្រមានអំពីហានិភ័យ នៃគ្រោះទឹកជំនន់ធ្ងន់ធ្ងរបន្តទៀត៕