(វ៉ាសូវី)៖ នាថ្ងៃពុធនេះ ប្រមុខការទូតរបស់សហរដ្ឋអាមេរិក និងចក្រភពអង់គ្លេស នឹងទៅដល់អ៊ុយក្រែនរួមគ្នា ក្នុងបំណងពិភាក្សាបន្ថែម អំពីលទ្ធភាពបន្ធូរបន្ថយការរឹតត្បិត ជុំវិញការប្រើប្រាស់សព្វាវុធរបស់លោកខាងលិច ដើម្បីបាញ់ចូលទៅក្នុងទឹកដីរុស្ស៉ី។ នេះបើតាមការចេញផ្សាយ ដោយទីភ្នាក់ងារព័ត៌មាន AFP នាថ្ងៃពុធ ទី១១ ខែកញ្ញា ឆ្នាំ២០២៤។

រដ្ឋមន្រ្តីការបរទេសអាមេរិក លោក Antony Blinken បានធ្វើដំណើររួមគ្នា ជាមួយរដ្ឋមន្រ្តីការបរទេសអង់គ្លេស លោក David Lammy តាមរយៈរថភ្លើងចេញពីក្រុងមួយ នៅខាងប្រទេសប៉ូឡូញ ជាប់ព្រំប្រទល់អ៊ុយក្រែន។ ប្រមុខការទូតទាំងពីរ នឹងត្រូវបើកកិច្ចពិភាក្សា​នៅទីក្រុងកៀវ ជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ដែលបាននិងកំពុងព្យាយាមទទូចឱ្យលោកខាងលិច ផ្តល់សព្វាវុធបន្ថែម ហើយកាត់បន្ថយការរឹតត្បិត លើការប្រើប្រាស់ពួកវា។

គួរបញ្ជាក់ថា នៅពេលដែលត្រូវបានសាកសួរនៅទីក្រុងវ៉ាស៉ីនតោន តើលោកនឹងអនុញ្ញាតឱ្យអ៊ុយក្រែន ប្រើអាវុធអាមេរិកវាយចូល កាន់តែជ្រៅក្នុងទឹកដីរុស្ស៉ី ដែរឬយ៉ាងណានោះ ប្រធានាធិបតីអាមេរិក លោក ចូ បៃដិន បានឆ្លើយតបថា រដ្ឋាភិបាលលោកកំពុងតែ​ធ្វើការលើរឿងនេះ។ ស្របពេលផ្តល់ការគាំទ្រយ៉ាងរឹងមាំដល់អ៊ុយក្រែន លោក បៃដិន ធ្លាប់បានបង្ហាញច្បាស់ថា លោកចង់បញ្ចៀស​ការផ្ទុះជម្លោះដោយផ្ទាល់ រវាងសហរដ្ឋអាមេរិកនិងរុស្ស៉ី ដែលជាមហាអំណាចនុយក្លេអ៊ែរខ្លាំងជាងគេទាំង២ របស់ពិភពលោក៕