(អង់ការ៉ា)៖ ស្ថានទូតអាមេរិកនៅក្នុងប្រទេសតួកគី និងការិយាល័យក្រុង បានឱ្យដឹងថា កាលពីថ្ងៃចន្ទសប្តាហ៍នេះ យុវជនជាតិនិយមតួកគីមួយក្រុម បានធ្វើសកម្មភាពវាយដំលើទាហានអាមេរិក ២នាក់ នៅឯភាគខាងលិចប្រទេស ហើយអ្នកធ្វើសកម្មភាពចំនួន ១៥នាក់ត្រូវបានឃុំខ្លួន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៣ ខែកញ្ញា ឆ្នាំ ២០២៤។

សេចក្តីថ្លែងការណ៍របស់ការិយាល័យក្រុង Izmir បានឱ្យដឹងថា សមាជិកក្រុម Turkey Youth Union (TGB) ដែលជាសាខាយុវជននៃគណបក្សប្រឆាំងជាតិនិយម Vatan បានធ្វើសកម្មភាពវាយដំលើរាង្គកាយទាហានអាមេរិកស្លៀកពាក់ស៉ីវិល ២នាក់ នៅក្នុងស្រុក Konak។ អ្នកធ្វើសកម្មភាពទាំង ១៥​នាក់​ត្រូវ​បាន​ឃុំ​ខ្លួន ហើយ​ការ​ស៉ើបអង្កេតកំពុងដំណើរការ។ អ្នកនាំពាក្យសេតវិមាននិយាយថា ទីក្រុងវ៉ាស៉ីនតោនមានក្តីបារម្ភជាខ្លាំង ជុំវិញអំពើហិង្សានោះ ហើយសូមកោតសរសើរប៉ូលិសតួកគី ដែលបានចាត់វិធានការប្រកបដោយការទទួលខុសត្រូវ។

គួរបញ្ជាក់ថា ក្រុម TGB បានបង្ហោះវីដេអូមួយលើបណ្តាញសង្គម X បង្ហាញនូវសកម្មភាពមនុស្សមួយក្រុម​ ​ចាប់​បុរស​ម្នាក់​នៅ​តាម​ដងផ្លូវ ហើយ​បញ្ជាក់ថា​ជា​ទាហាន​អាមេរិកនៅ​លើ​នាវាចម្បាំង USS Wasp អមជាមួយសារបញ្ជាក់ថា «ទាហានអាមេរិក ដែលជីវិតទាហានរបស់យើង និងប៉ាឡេស្ទីនរាប់ពាន់នាក់ស្ថិតក្នុងដៃពួកគេ មិនអាចធ្វើឱ្យប្រទេសរបស់យើងប្រឡាក់បានទេ។ រាល់អ្នកដើរក្នុងទឹកដីរបស់យើង យើងនឹងជួបអ្នកតាមរបៀបដែលអ្នក សមនឹងទទួលបាន»។

មុនពេលមានឧប្បត្តិហេតុនោះកើតឡើង​ ស្ថានទូតអាមេរិកប្រចាំទីក្រុងអង់ការ៉ា បានប្រកាសថា នាវាមួយគ្រឿងរបស់ខ្លួន កំពុងធ្វើទស្សនកិច្ចនៅទីក្រុងកំពង់ផែឆ្នេរសមុទ្រ Aegean គឺ Izmir នៅសប្តាហ៍នេះ។ ទំនាក់ទំនងសហរដ្ឋអាមេរិក-តួកគីកាន់តែធ្លាក់ចុះ រាប់ចាប់តាំងពីសម្ព័ន្ធភាពអាមេរិកជាមួយក្រុមជនជាតិ Kurds នៅស៉ីរី ផែនការលក់យន្តហោះចម្បាំ F-35 រហូតដល់សង្រ្គាមនៅតំបន់ហ្កាហ្សា៕