(ម៉ានីល)៖ ក្រុមមន្រ្តីនិយាយថា ភ្លៀងធ្លាក់ខ្លាំងដោយសារតែឥទ្ធិពលនៃព្យុះត្រូពិក នៅក្នុងប្រទេសហ្វីលីពីន ចូលមកដល់ថ្ងៃទី ២នៅថ្ងៃចន្ទនេះ បណ្តាលឱ្យមានទឹកជំនន់ និងការរអិលបាក់ដី ហើយបណ្តាលឱ្យមនុស្ស ១១នាក់ស្លាប់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី២ ខែសីហា ឆ្នាំ ២០២៤។

ក្រុមជួយសង្គ្រោះនិយាយថា ភាគខាងកើតនៃទីក្រុង Naga ស្ថិតក្នុងចំណោមតំបន់រងគ្រោះខ្លាំងបំផុត ខណៈដែលព្យុះត្រូពិច Yagi បានបោកបក់ចេញពីឆ្នេរសមុទ្រ កាលពីយប់ថ្ងៃអាទិត្យ បណ្តាលឱ្យមនុស្សពីរនាក់ស្លាប់ និងទឹកជំនន់។​ លោក Joshua Tuazon មន្រ្តីការការិយាល័យសុវត្ថិភាពសាធារណៈក្រុង បានប្រាប់ AFP ថា «ទឹកជំនន់បានឡើងខ្លាំងនៅតំបន់ខ្លះ ហើយអ្នកស្រុករាប់រយនាក់ ត្រូវបានជួយសង្គ្រោះ។

គិតត្រឹមថ្ងៃចន្ទនេះ មនុស្សច្រើនជាង ៣០០នាក់ បន្តស្ថិតក្នុងជំរំសុវត្ថិភាព ដោយបើតាមមន្ត្រីក្នុងតំបន់ ទឹកជន់លិចនៅទីក្រុងដែលមានមនុស្សចំនួន ២១០,០០០នាក់រស់នៅ ខណៈដែលទឹកស្រកចុះយឺត។ ការិយាល័យគ្រោះមហន្តរាយក្នុងតំបន់ បានប្រាប់ AFP ថា ការរអិលបាក់ដី ២លើកធ្វើឱ្យមនុស្ស ២នាក់ស្លាប់ ខូចខាតផ្ទះ​ ៥ខ្នង នៅកណ្តាលទីក្រុង Cebu កាលពីថ្ងៃអាទិត្យ។

គួរបញ្ជាក់ថា តាមការព្យាករ ព្យុះ Yagi កំពុងឆ្ពោះទៅភាគខាងជើងតំបន់ឆ្នេរសមុទ្រ នៃកោះដ៏ធំមួយរបស់ហ្វីលីពីន គឺ Luzon នៅព្រឹកថ្ងៃចន្ទនេះ (ម៉ោងក្នុងតំបន់) ជាមួយនិងខ្យល់បក់បោកល្បឿន ៧៥គីឡូម៉ែត្រក្នុងមួយម៉ោង។ វាអាចនឹងបោកបក់លើខេត្ត Isabela ភាគខាងជើងនៅថ្ងៃបន្ទាប់។ Isabela មានក្រុងចំនួន ៤ និងប្រជាជនរស់នៅប្រហែល ៣៣,០០០នាក់ ហើយក្រុមមន្រ្តីកំពុងត្រូវបានណែនាំ ឱ្យត្រៀមលក្ខណៈសម្រាប់ការជម្លៀសប្រជាជន៕