(ព័រអ៊ូព្រីន)៖ ស្ថានទូតតៃវ៉ាន់ក្នុងប្រទេសហៃទី បានផ្តល់ឧបករណ៍សម្រាប់ការពារខ្លួន ដូចជា មួកសុវត្ថិភាព ទ្រនាប់ការពារជង្គង់ វែនតាការពារភ្នែក និងអាវការពារគ្រាប់កាំភ្លើង ទៅឱ្យប៉ូលិស ក៏ដូចជាកងទ័ពហៃទី ដើម្បីជួយគាំទ្រការទប់ទល់របស់ពួកគេ ប្រឆាំងនឹងក្រុមជនអន្ធពាលដ៏មានឥទ្ធិពលនៅក្នុងប្រទេស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៣០ ខែសីហា​ ឆ្នាំ ២០២៤។

ការិយាល័យនាយករដ្ឋមន្រ្តីហៃទី បានឱ្យដឹងថា ឧបករណ៍ការពារ ៤០០ឈុតត្រូវបានបញ្ជូនមក ដែលនាំឱ្យចំនួនសរុបនៃការបរិច្ចាគរបស់តៃវ៉ាន់ នូវឧបករណ៍ប្រភេទនេះកើនឡើងដល់ ៨០០ឈុត ក្នុងរយៈពេលពីរឆ្នាំ។ លោក Garry Conille នាយករដ្ឋមន្រ្តីហៃទី គូសបញ្ជាក់ថា «ការបរិច្ចាគនេះ មិនត្រឹមតែជាការចែករំលែកសម្ភារៈប៉ុណ្ណោះទេ តែជាការឆ្លុះបញ្ចាំងនូវទឹកចិត្ត និងមិត្តភាពយូអង្វែងរវាងហៃទី-តៃវ៉ាន់»។

គួរបញ្ជាក់ថា ហៃទី គឺជាប្រទេសមួយនៅក្នុងតំបន់ Caribbean ដែលមានសម្ព័ន្ធភាពការទូតជាមួយតៃវ៉ាន់ ប៉ុន្តែក៏មានការិយាល័យពាណិជ្ជកម្ម នៅទីក្រុងប៉េកាំង ប្រទេសចិនផងដែរ៕