(ហ៊្សេរុយសាឡិម)៖ ក្រុមមន្រ្តីអ៉ីស្រាអែល និងប្រព័ន្ធផ្សព្វផ្សាយ កាលពីថ្ងៃចន្ទសប្តាហ៍នេះ បាននាំគ្នាបញ្ចេញមតិដោយប្រតិកម្ម ជុំវិញការវាយប្រហារដោយមីស៉ីលពីចលនាប្រដាប់អាវុធគាំទ្រដោយអ៉ីរ៉ង់ Hezbollah ថាហាក់ដូចជាមានសភាពខ្លាំងក្លាជាង ការវាយប្រហាររបស់អ៉ីស្រាអែលមុនៗ នៅភាគខាងត្បូងលីបង់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៧ ខែសីហា ឆ្នាំ ២០២៤។

អ្នកនាំពាក្យរដ្ឋាភិបាលអ៉ីស្រាអែល លោក David Mencer និយាយថា ក្រុម Hezbollah ធ្លាប់រងការវាយលុកធ្ងន់ធ្ងរ ដោយការវាយប្រហាររបស់អ៉ីស្រាអែល ប៉ុន្តែដំណោះស្រាយយូរអង្វែងនៅតែត្រូវការ។ ដោយសំដៅទៅលើការរត់ភៀសខ្លួន នៃមនុស្សរាប់ពាន់នាក់ចេញពីផ្ទះសម្បែងរបស់ពួកគេ នៅឯភាគខាងជើងប្រទេស លោកបានប្រាប់សន្និសីទសារព័ត៌មានថា «ស្ថានភាពឥឡូវនេះគឺមិនមានស្ថិរភាពទេ។ អ៉ីស្រាអែល​នឹង​បំពេញ​កាតព្វកិច្ច ហើយ​ធ្វើឱ្យ​ប្រជាជនអាចត្រលប់មករស់នៅលើទឹកដី​របស់​ខ្លួន​វិញ»។

ដោយឡែក លោក Avi Issacharoff ដែលជាអ្នកនិយាយតំណាងឱ្យកាសែត Yedioth Ahronoth របស់អ៉ីស្រាអែល បានលើកឡើងថា «ប្រហែលជាមានតែជោគជ័យរបស់អ៉ីស្រាអែល ក្នុងការរារាំងចំពោះការសងសឹករបស់ក្រុម Hezbollah ទេ ដែលអាចត្រួសត្រាយផ្លូវឱ្យក្រុមហាម៉ាស ផ្តល់សម្បទានលើការចរចាកិច្ចព្រមព្រៀង ដើម្បីដោះលែងចំណាប់ខ្មាំង ហើយធ្វើឱ្យការទប់ស្កាត់សង្រ្គាមរាលដាលក្នុងតំបន់ ត្រូវបរាជ័យ»។

គួរបញ្ជាក់ថា ទាំងក្រុម Hezbollah និងអ៉ីស្រាអែល ហាក់ដូចជាចាត់ទុកការវាយប្រហារដោយមីស៉ីល កាលពីថ្ងៃអាទិត្យ ជាការសងសឹកចំពោះការសម្លាប់មេបញ្ជាការជាន់ខ្ពស់របស់ Hezbollah ក្នុងទីក្រុងបេរូត កាលពីខែមុន ថាបានទូទាត់គ្នារួចរាល់ហើយនៅពេលនេះ។ ប៉ុន្តែការ​បាញ់ផ្លោងដាក់​គ្នា​ នៅតែ​បន្ត​មកទល់នឹង​ថ្ងៃ​ចន្ទសប្តាហ៍នេះ ដោយមិនមានភាគីម្ខាងណាអះអាងនោះទេ៕