(តេហេរ៉ង់)៖ រដ្ឋមន្រ្តីការបរទេសអ៉ីរ៉ង់ លោក Abbas Araqchi បានប្រាប់សមភាគីអ៉ីតាលី លោក Antonio Tajani ថាទីក្រុងតេហេរ៉ង់ មិនបានស្វែងរកការបង្កើនភាពតានតឹងក្នុងតំបន់មជ្ឈិមបូព៌ានោះទេ ប៉ុន្តែការឆ្លើយតបចំពោះ ការធ្វើឃាតមេដឹកនាំក្រុមហាម៉ាស នៅលើទឹកដីអ៉ីរ៉ង់ នឹងត្រូវតែធ្វើឡើងដោយគិតគូរច្បាស់លាស់។ នេះបើយោងតាមការចេញផ្សាយ ដោយទីភ្នាក់ងារសាព័ត៌មាន Reuters នៅថ្ងៃចន្ទ ទី២៦​ ខែសីហា ឆ្នាំ ២០២៤។

ក្រសួងការបរទេសអ៉ីរ៉ង់ចេញសេចក្តីថ្លែងការណ៍មួយថា «លោករដ្ឋមន្រ្តី Araqchi បានប្រាប់សមភាគីអ៉ីតាលី ក្នុងជំនួបតាមទូរស័ព្ទថា អ៉ីរ៉ង់មិនបានស្វែងរកការបង្កើនភាពតានតឹងឡើយ ទោះបីជាខ្លួនមិនខ្លាចក៏ដោយ»។ យ៉ាងនេះក្តី លោក Araqchi «ការឆ្លើយតបរបស់អ៉ីរ៉ង់នឹងធ្វើឡើង ដោយមានការកំណត់ និងគណនាច្បាស់លាស់»។

គួរបញ្ជាក់ថា អ៉ីរ៉ង់ បានស្តីបន្ទោសអ៉ីស្រាអែល ជុំវិញការសម្លាប់ លោក Ismail Haniyeh ដែលជាមេដឹកនាំនយោបាយហាម៉ាស កាលពីថ្ងៃទី៣១ ខែកក្កដា។ មកទល់នឹងពេលនេះ អ៉ីស្រាអែលមិនបានបដិសេធ ឬទទួលស្គាល់ការស្លាប់នេះនោះទេ៕