(ហាណូយ)៖ រដ្ឋសភានៃប្រទេសវៀតណាម នាថ្ងៃចន្ទនេះ នឹងធ្វើការបោះឆ្នោត ដើម្បីតែងតាំងឧបនាយករដ្ឋមន្រ្តីថ្មីចំនួន៣នាក់ ក៏ដូចជាដើម្បីដកឧបនាយករដ្ឋមន្រ្តីបច្ចុប្បន្ន២នាក់ ចេញពីតំណែង អំឡុងការបើកសម័យប្រជុំវិសាមញ្ញមួយ ដែលមានរយៈពេល​១ថ្ងៃ នៅទីក្រុងហាណូយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី២៦ ខែសីហា ឆ្នាំ២០២៤។

មិនតែប៉ុណ្ណោះ អំឡុងសម័យប្រជុំវិសាមញ្ញខាងលើ សភាវៀតណាម ក៏នឹងត្រូវបោះឆ្នោតដើម្បីតែងតាំង រដ្ឋមន្រ្តីបរិស្ថានថ្មី ព្រមទាំង​រដ្ឋមន្រ្តីយុត្តិធម៌ថ្មី ផងដែរ។ យ៉ាងណាមិញ សេចក្តីថ្លែងការណ៍របស់សភាវៀតណាម មិនបានបញ្ជាក់អំពីឈ្មោះ របស់ក្រុមមន្រ្តីដែល​ត្រូវតែងតាំងថ្មី និងមន្រ្តីដែលត្រូវចាកចេញពីតំណែង នោះទេ។

គួរបញ្ជាក់ថា ការផ្លាស់ប្តូរនាថ្ងៃចន្ទនេះ គឺបន្ទាប់ពីវៀតណាមបានជួប ភាពមិននឹងនរផ្នែកនយោបាយ ក្នុងរយៈពេល​ប៉ុន្មានឆ្នាំចុងក្រោយនេះ ដែលបានមើលឃើញ ប្រធានាធិបតី២នាក់ និងប្រធានរដ្ឋសភាម្នាក់ ត្រូវបានបង្ខំឱ្យចុះចេញពីតំណែង។ សព្វថ្ងៃ វៀតណាមមានឧបនាយករដ្ឋមន្រ្តីសរុប៤នាក់ ធ្វើការក្រោមនាយករដ្ឋមន្រ្តីលោក Pham Minh Chinh។ នៅក្រោយ​ការបោះឆ្នោតនាថ្ងៃចន្ទ ចំនួនឧបនាយករដ្ឋមន្រ្តីវៀតណាម នឹងកើនដល់៥នាក់៕