(ភ្នំពេញ)៖ ព្រោះតែសង្គ្រាមរវាងប្រទេសអ៉ីស្រាអែល និងក្រុមហាម៉ាស បានបន្សល់ទុកសាកសពមនុស្សរាប់ម៉ឺននាក់ របួសរាប់សែននាក់ និងកំពុងទទួលរងការឈឺចាប់ខ្លោចផ្សាដ៏សែនវេទនារាប់លាននាក់ សម្រាប់ប្រជាជនប៉ាឡេស្ទីន។

រហូតមកដល់ពេលនេះបទឈប់បាញ់ នៅតែជាក្តីសុបិន្តនៅឡើយ មិនទាន់ក្លាយជាការពិតនោះទេ ខណ:ដែលប្រជាជនប៉ាឡេស្ទីនបានស្លាប់ របួស គ្មានជម្រក អត់អាហារ និងព្រាត់ប្រាសគ្រួសារកាន់តែច្រើនឡើង។

នេះជាសង្គ្រោមដែលមនុស្សជាតិលើភពផែនដី មិនចង់ឃើញ មិនចង់បាន និងមិនចង់ទទួលនោះទេ។

សម្រាប់កម្ពុជារបស់យើង ដែលកំពុងមានសន្តិភាពពេញលេញលើផ្ទៃប្រទេសទៅហើយ ហេតុអ្វីមនុស្សមួយចំនួនតូចនៅតែចង់ឲ្យស្ថានភាពដ៏អាក្រក់នេះកើតនៅស្រុកទេសរបស់យើង? សូមប្តេជ្ញា និងរួមគ្នាការពារសន្តិភាពឲ្យបានជាដាច់ខាត ទើបយើងមានឱកាសអភិវឌ្ឍន៍សង្គមជាតិកម្ពុជាកាន់តែរីកចំរើនទៅមុខ។

សូមស្តាប់សំដីដ៏មានន័យ និងធ្វើឲ្យចាក់ចំបេះដូងមនុស្សជាតិលើលោក ពីសំណាក់ក្មេងស្រីប៉ាឡេស្ទីនម្នាក់ ក្នុងកិច្ចសម្ភាសជាមួយទូរទស្សន៍ Al Jazeera!

សម្តីក្មេងស្រីប៉ាឡេស្ទីនម្នាក់ ដែលត្រូវព្រាត់ប្រាសពីផ្ទះសម្បែង ដោយសារតែសង្រ្គាម៖ «តើឯណាទៅក្រុមប្រទេសអារ៉ាប់? ឯណាទៅអេហ្ស៉ីប? ពួកយើងហត់នឿយណាស់។

ខ្ញុំបានដើរយ៉ាងឆ្ងាយទម្រាំមកដល់ទីនេះ។ តើបទឈប់បាញ់នៅឯណា? ពួកយើងចង់ឱ្យមានបទឈប់បាញ់។ ខ្ញុំអស់កម្លាំងណាស់។

ពួកប្រទេសអារ៉ាប់ កំពុងឈរមើលពួកយើង ទទួលរងទារុណកម្ម។ ពួកយើងពិតជានឿយហត់ណាស់។

ខ្ញុំចង់ឱ្យវាបញ្ចប់ទៅវិញឆាប់ៗ។ ពួកក្មេងៗអារ៉ាប់ មានភាពសប្បាយរីករាយ លើកលែងតែ​ពួកយើង ដែលកំពុងរងការជិះជាន់ធ្វើបាប។ នៅជុំវិញពួកយើង សុទ្ធតែគំនរអគារបែកបាក់»។

នៅពេលត្រូវ​គេសួរនាំថា តើឥឡូវនាងកំពុងដំណើរឆ្ពោះទៅកាន់ទីណាវិញ? ក្មេងស្រីនោះបានឆ្លើយតបថា «ពួកយើងមិនដឹងទេ។

ពួកយើងមិនអាចរកកន្លែងដែលត្រូវទៅបាននោះទេ។ ពួកយើងកំពុងព្យាយាមរកកន្លែង ដែលត្រូវទៅ ប៉ុន្តែហាក់រកពុំបានឡើយ»។