(តៃប៉ិ)៖ មេដឹកនាំ លោក Lai Ching-te បាននិយាយនៅថ្ងៃសុក្រ ទី២៣ ខែសីហានេះថា តៃវ៉ាន់​ចង់​បន្ត​របៀប​រស់​នៅ​ដោយ​សេរី​របស់​ខ្លួន ហើយជំទាស់ទៅនឹងបំណងរបស់ចិនដែលចង់គ្រប់គ្រងតៃវ៉ាន់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP។

ការអត្ថាធិប្បាយរបស់លោក Lai ធ្វើឡើងនៅពេលលោកចុះទៅកាន់​កោះ Kinmen និងកោះ Matsu ដែលនៅទល់មុខនឹ ងប្រទេសចិន​ ហើយដែលត្រូវបានកត់សម្គាល់ថាជាសមរភូមិ​ដ៏សំខាន់ ករណី​ចិនប្រើកម្លាំងយោធាដើម្បីបង្រួបបង្រួមជាមួយតៃវ៉ាន់។ ក្នុងដំណើរទស្សនកិច្ចលើកដំបូង បន្ទាប់ពីឡើងកាន់តំណែង លោក Lai បានដាក់កម្រងផ្កា និងសម្តែងការគោរព នៅឯឧទ្យានរំលឹកខួបលើកទី ៦៦នៃការប៉ះទង្គិចគ្នាជាមួយកងកម្លាំងចិន ដែលគេស្គាល់ថាជាពេលចាប់ផ្តើម នៃវិបត្តិច្រកសមុទ្រតៃវ៉ាន់ លើកទីពីរ។ លោក Lai គូសបញ្ជាក់ថា «តៃវ៉ាន់ត្រូវតែទប់ទល់នឹងការគំរាមកំហែងរបស់ចិន។ គោលបំណងរបស់យើង គឺសង្ឃឹមថានឹងមានការអភិវឌ្ឍប្រកបដោយសន្តិភាព នៅទូទាំងច្រកសមុទ្រតៃវ៉ាន់។ តៃវ៉ាន់បន្តពង្រឹង និងចំណាយបន្ថែមទៀតលើវិស័យយោធា ហើយនឹងការពារអធិបតេយ្យរបស់ខ្លួន»។

គួរបញ្ជាក់ថា Kinmen ស្ថិតនៅ​​ចម្ងាយ​តិចជាង ២គីឡូម៉ែត្រប៉ុណ្ណោះ ពី​ប្រទេស​ចិន។ វិបត្តិឆ្នាំ ១៩៥៨ គឺជាលើកចុងក្រោយ ដែលកងកម្លាំងតៃវ៉ាន់ប្រយុទ្ធគ្នាជាមួយកងកម្លាំងចិន ក្នុងទ្រង់ទ្រាយធំ ដោយនៅក្នុងខែសីហា ឆ្នាំនោះ កងកម្លាំងចិន បានទម្លាក់គ្រាប់បែករយៈពេលជាង ១ខែលើកោះ Kinmen និងកោះ Matsu រួមទាំងបើកសមរភូមិជើងទឹក និងតាមផ្លូវអាកាស។ បច្ចុប្បន្ន Kinmen ជាគោលដៅទេសចរណ៍ដ៏ពេញនិយមមួយ ទោះបីជាតៃវ៉ាន់រក្សាវត្តមានយោធាសំខាន់ៗ នៅទីនោះក៏ដោយ៕