(HYDERABAD, ឥណ្ឌា)៖ ក្រុមមន្ត្រីនៅក្នុងប្រទេសឥណ្ឌា បានឱ្យដឹងថាមនុស្សយ៉ាងហោច ១៥នាក់បានស្លាប់ នៅក្នុងហេតុការណ៍ផ្ទុះមួយកាលពីថ្ងៃពុធ ទី២១ ខែសីហា នៅឯរោងចក្រផលិតថ្នាំពេទ្យមួយកន្លែង ស្ថិតនៅក្នុងរដ្ឋ Andhra Pradesh នៃភាគអាគ្នេយ៍ប្រទេសឥណ្ឌា។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters។

មន្ត្រីប៉ូលិសក្នុងតំបន់ លោក Deepika បានប្រាប់ Reuters​ ថាគិតត្រឹមថ្ងៃពុធ ចំនួនអ្នកស្លាប់កើនដល់១៥នាក់ ហើយអាចបន្តកើនឡើង ខណៈមនុស្សជិត៤០នាក់ បានរងរបួស។ ការផ្ទុះដែលបង្កទៅជាអគ្គិភ័យ បានកើតឡើងកាលពីរសៀសថ្ងៃពុធ នៅឯរោងចក្ររបស់ក្រុមហ៊ុន Escientia Advanced Sciences នៅក្នុងស្រុក Anakapalli នៃរដ្ឋ Andhra Pradesh។

ក៏ប៉ុន្តែ ក្រុមហ៊ុន Escientia មិនបានធ្វើអត្ថាធិប្បាយអ្វីទេ ហើយរដ្ឋាភិបាលប្រចាំរដ្ឋបានបង្គាប់ឱ្យបើកការស៊ើបអង្កេតលើហេតុការណ៍ផ្ទុះឆេះខាងលើ។

គួរបញ្ជាក់ថា កាលពីឆ្នាំ២០២៣ មនុស្ស ២នាក់បានស្លាប់ និង៥នាក់ផ្សេងទៀតរងរបួស នៅក្នុងហេតុការណ៍អគ្គិភ័យស្រដៀងគ្នានេះដែលបានកើតឡើងនៅឯ រោងចក្រមួយរបស់ក្រុមហ៊ុនផលិតថ្នាំពេទ្យ Sahithi Pharma ក្នុងស្រុក Anakapalli៕