(វ៉ាស៉ីនតោន)៖ នៅពេលទៅដល់ទីក្រុង Chicago ដើម្បីបើកសមាជរបស់គណបក្សប្រជាធិបតេយ្យ លោកប្រធានាធិបតី ចូ បៃដិន នឹងស្នើដល់ក្រុមអ្នកប្រជាធិបតេយ្យឱ្យរួបរួមគ្នាគាំទ្រអនុប្រធានាធិបតី លោកស្រី Kamala Harris ដើម្បីផ្តួលគូប្រជែង លោក Donald Trump បេក្ខជនរបស់គណបក្សសាធារណរដ្ឋ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២០ ខែសីហា ឆ្នាំ ២០២៤។

ក្រុមអ្នកគាំទ្រគណបក្សប្រជាធិបតេយ្យ បានជួបជុំគ្នាក្នុងសមាជជាតិរបស់ពួកគេ នៅឯទីលាន United Center នៃទីក្រុង Chicago ខណៈដែលវត្តមានរបស់ លោក បៃដិន ដើម្បីបើកយុទ្ធការ​រយៈ​ពេល​ ៤​ថ្ងៃនៅទីនោះ នឹង​តំណាងឱ្យការផ្ទេរប្រជាប្រិយភាពទៅឱ្យ លោកស្រី Harris បន្ទាប់ពីលោកសម្រេចចិត្តបោះបង់ការប្រកួតប្រជែងតំណែងប្រធានាធិបតីនៅអាណត្តិទី ២ ក្នុងការបោះឆ្នោតសហរដ្ឋអាមេរិក នៅខែវិច្ឆិកា។ តាមការគ្រោងទុក នៅម៉ោង ១០ និង ៥០នាទីយប់ថ្ងៃចន្ទ (ម៉ោងនៅអាមេរិក) លោក បៃដិន ក៏នឹងលើកយកបញ្ហារបស់ លោក Trump មកបរិយា​ថា​ជា​ការ​គំរាមកំហែង​ដល់​លទ្ធិប្រជាធិបតេយ្យ​​អាមេរិក ហើយនិយាយ​​អំពី​សមិទ្ធិផល​នៃ​រដ្ឋបាល Biden-Harris។ គេរំពឹងថា លោកស្រី Harris នឹងចូលរួមក្នុងវេទិកានោះជាមួយ លោក បៃដិន។

គួរបញ្ជាក់ថា ការស្ទង់មតិកាលពីខែមុន បង្ហាញច្បាស់ថាលោក Trump នាំមុខលោក Biden ប៉ុន្តែចំពោះវិញ លោក Harris បានតាមទាន់យ៉ាងប្រកៀកប្រកិត ទាំងថ្នាក់ជាតិ និងនៅក្នុងរដ្ឋជាច្រើនដែលមានការប្រកួតប្រជែងគ្នាខ្ពស់ រួមទាំង Pennsylvania ដែលជារដ្ឋមួយដើរតួយ៉ាងសំខាន់ក្នុងការបោះឆ្នោតនៅអាមេរិក៕