(ហ្សាការតា)៖ ប្រធានាធិបតីជាប់ឆ្នោតនៃប្រទេសឥណ្ឌូណេស៉ី លោក Prabowo Subianto ទើបធានាបានសំឡេងគាំទ្រភាគច្រើន នៅក្នុងសភា បន្ទាប់ពីគណបក្សដែលពីមុនមក បានគាំទ្រគូប្រជែងរបស់លោក ក្នុងការបោះឆ្នោតកាលពីខែកុម្ភៈ បានប្រកាសក្នុងសប្តាហ៍នេះថា នឹងមកចូលរួមក្នុងក្រុមចម្រុះរបស់លោកដែរ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី១៦ ខែសីហា ឆ្នាំ២០២៤។

គណបក្ស NasDem ដែលមានអាសនៈប្រហែល១០ភាគរយ នៅក្នុងសភា បានប្រកាសកាលពីថ្ងៃព្រហស្បតិ៍សប្តាហ៍នេះថា ខ្លួននឹងចូលរួមគាំទ្ររដ្ឋាភិបាលរបស់លោក Prabowo ខណៈប្រការនេះនឹងធ្វើឱ្យការគ្រប់គ្រងចំនួនអាសនៈសភា នៃក្រុមគណបក្សចម្រុះរបស់លោក កើន​ពី៤៣ភាគរយនាពេលបច្ចុប្បន្ន ឡើងដល់៥២ភាគរយ។ ការកាន់កាប់សំឡេងភាគច្រើន នៅក្នុងសភា នឹងជួយធ្វើឱ្យ​រលូននូវដំណើរការអនុម័ត សេចក្តីព្រាងឬស្នើច្បាប់ផ្សេងៗ រួមមានទាំងកញ្ចប់ថវិកាឆ្នាំ២០២៥ ដែលប្រធានាធិបតីឥណ្ឌូណេស៉ីចាំផ្ទះលោក Joko Widodo នឹងប្រកាសនាថ្ងៃសុក្រនេះ។ លោក Prabowo និងស្បថចូលកាន់តំណែងជាផ្លូវការ នាថ្ងៃទី២០ ខែតុលា។

គួរបញ្ជាក់ថា កន្លងមក ក្រុមចម្រុះរបស់លោក Prabowo មានគណបក្សចូលរួមសរុបចំនួន៥ ហើយលោកក៏កំពុងចរចាជាមួយ​គណបក្សអ៉ីស្លាមធំបំផុត នៅឥណ្ឌូណេស៉ីផងដែរ ដែលគ្រប់គ្រងអាសនៈ១០ភាគរយ នៅក្នុងសភា។ គណបក្ស NasDem ធ្លាប់បានគាំទ្រលោក Anies Baswedan ដែលជាបេក្ខជនបានទទួលបរាជ័យ ក្រោមដៃលោក Prabowo ក្នុងការបោះឆ្នោតជ្រើសរើសប្រធានាធិបតីឥណ្ឌូណេស៉ី កាលពីខែកុម្ភៈ ឆ្នាំនេះ៕