(វ៉ាស៉ីនតោន)៖ បុរសម្នាក់នៅសហរដ្ឋអាមេរិក ដែលបានចំណាយពេលជិត៥ទសវត្សរ៍ ក្នុងពន្ធនាគារសម្រាប់អំពើឃាតកម្ម ដែលខ្លួន​មិនបានប្រព្រឹត្ត នឹងត្រូវទទួលបានប្រាក់សំណង ចំនួន៧.១៥លានដុល្លារ ពីទីក្រុងដែលបានផ្តន្ទាទោសខុសលើរូបលោក។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP នាថ្ងៃសុក្រ ទី១៥ ខែសីហា ឆ្នាំ២០២៤។

បុរសខាងលើមានឈ្មោះថា Glynn Simmons គឺជាជនជាតិអាមេរិកស្បែកខ្មៅ ដែលសព្វថ្ងៃមានអាយុ៧១ឆ្នាំ។ លោកត្រូវបាន​ដោះលែងចេញពីពន្ធនាគារវិញ កាលពីឆ្នាំ២០២៣ ក្រោយជាប់អស់រយៈពេលសរុប៤៨ឆ្នាំ ១ខែ និង១៨ថ្ងៃ។ លោក Simmons និងបុរសម្នាក់ទៀតឈ្មោះ Don Roberts ត្រូវបានផ្តន្ទាទោសប្រហារជីវិត ក្នុងទីក្រុង Oklahoma នៅឆ្នាំ១៩៧៥ សម្រាប់ករណីឃាតកម្មកាលពី១ឆ្នាំ​មុននោះ លើបុគ្គលិកហាងលក់គ្រឿងស្រវឹងម្នាក់ អំឡុងករណីចោរកម្មមួយ នៅក្រុង Edmond នៃរដ្ឋ Oklahoma។

ទោសប្រហារជីវិតរបស់អ្នកទាំងពីរ ក្រោយមកត្រូវបានបន្ធូរបន្ថយមកត្រឹម ទោសជាប់ពន្ធនាគារអស់មួយជីវិត។ ការផ្តន្ទាទោស លោក Simmons និង Roberts គឺផ្អែកលើមូលដ្ឋាន នៃការផ្តល់សក្ខីកម្មតែមួយគត់ ពីសំណាក់អតិថិជនជាក្មេងស្រីជំទង់​ម្នាក់ ដែលត្រូវបានបាញ់ចំក្បាល អំឡុងករណីចារកម្មពេលនោះ ប៉ុន្តែបានរួចរស់ជីវិត។ យ៉ាងណាមិញ ការស៉ើបអង្កេតក្រោយមកទៀត បានជះមន្ទិលសង្ស័យខ្លាំង ទៅលើភាពគួរឱ្យជឿទុកចិត្ត នៃការកំណត់អត្តសញ្ញាណ របស់សាក្សីម្នាក់នោះ។

គួរបញ្ជាក់ថា អំឡុងសវនាការជំនុំជម្រះ លោក Simmons និង លោក Roberts ធ្លាប់បានអះអាងថា ពួកគេមិនទាំងបានស្ថិត​នៅក្នុងរដ្ឋ Oklahoma នោះឡើយ អំឡុងពេលករណីឃាតកម្មកើតឡើង។ លោក Roberts ត្រូវបានដោះលែងពីពន្ធនាគារ មុនលោក Simmons គឺកាលពីឆ្នាំ២០០៨។ ការទទួលបានសំណងខាងលើកើតមានឡើង បន្ទាប់ពី លោក Simmons បានដាក់ពាក្យបណ្តឹងប្រឆាំង​ទីក្រុង Oklahoma និងប៉ូលិសស៉ើបអង្កេតម្នាក់៕