(អាថែន)៖ មន្ត្រីក្រិកបានឱ្យដឹងថា ប្រជាជនរាប់ពាន់នាក់ រួមទាំងនៅក្នុងទីក្រុងប្រវត្តិសាស្ត្រ ម៉ារ៉ាតុង ដែលនៅជិតទីក្រុងអាថែន បានភៀសខ្លួនចេញពីផ្ទះរបស់ពួកគេ ខណៈដែលភ្លើងឆេះព្រៃបានរាលដាលខិតមកកាន់តែជិតរដ្ឋធានីមួយនេះ ទោះបីជាមានការខិតខំប្រឹងប្រែងយ៉ាងខ្លាំងក្នុងការទប់ស្កាត់ក៏ដោយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី១២ ខែសីហា ឆ្នាំ២០២៤។

អាជ្ញាធរបានបញ្ជាឱ្យសហគមន៍យ៉ាងហោចណាស់ប្រាំទៀត និងមន្ទីរពេទ្យពីរកន្លែងនៅភាគឦសានទីក្រុងអាថែនឱ្យជម្លៀសចេញ បន្ទាប់ពីភូមិចំនួនប្រាំបីដែលនៅក្បែរនោះ រួមទាំង ម៉ារ៉ាតុង ត្រូវបានប្រាប់ឱ្យជម្លៀសខ្លួននៅថ្ងៃអាទិត្យ។

អភិបាលក្រុង ម៉ារ៉ាតុង បាននិយាយថា ទីក្រុងដែលបានដាក់ឈ្មោះឱ្យការរត់ចម្ងាយឆ្ងាយ ដែលជាចំណុចកណ្តាលនៃព្រឹត្តិការណ៍អូឡាំពិក កំពុងប្រឈមមុខនឹង «គ្រោះមហន្តរាយ»។

ស្ថានីយទូរទស្សន៍សាធារណៈ ERT បានរាយការណ៍ថា ជញ្ជាំងភ្លើងដែលមានប្រវែង ៣០គីឡូម៉ែត្រ និងមានកម្ពស់ជាង ២៥ម៉ែត្រ កំពុងឆាបឆេះឆ្ពោះទៅទីក្រុងអាថែន។

មនុស្សចំនួនប្រាំបីនាក់ត្រូវបានបញ្ជូនទៅមន្ទីរពេទ្យដោយសារបញ្ហាផ្លូវដង្ហើម ហើយអាជ្ញាធរបានបើកពហុកីឡដ្ឋានអូឡាំពិកនៅភាគខាងជើងទីក្រុងអាថែន ដើម្បីផ្ទុកមនុស្សដែលកំពុងភៀសខ្លួន។

លោក Vassilis Vathrakogiannis អ្នកនាំពាក្យកងពន្លត់អគ្គីភ័យបាននិយាយថា «កងកម្លាំងការពារជនស៊ីវិលបានប្រយុទ្ធយ៉ាងស្វិតស្វាញពេញមួយយប់ ប៉ុន្តែទោះបីជាមានការខិតខំប្រឹងប្រែងយ៉ាងណាក៏ដោយ ភ្លើងបានរីករាលដាលយ៉ាងឆាប់រហ័ស»។

នាយករដ្ឋមន្ត្រី Kyriakos Mitsotakis បានកាត់បន្ថយថ្ងៃឈប់សម្រាករបស់លោក ដើម្បីត្រឡប់មកដោះស្រាយវិបត្តិនេះ។ បច្ចុប្បន្ន មានអ្នកពន្លត់អគ្គីភ័យជាង ៦៧០នាក់ រថយន្តពន្លត់អគ្គីភ័យ ១៨៣គ្រឿង និងយន្តហោះ ៣២គ្រឿង កំពុងតស៊ូប្រយុទ្ធនឹងភ្លើងឆេះព្រៃដ៏សាហាវនេះ។

គួរបញ្ជាក់ថា រដូវក្តៅឆ្នាំនេះ ប្រទេសក្រិកបានជួបប្រទះនឹងភ្លើងឆេះព្រៃជាញឹកញាប់ បន្ទាប់ពីប្រទេសនេះបានកត់ត្រាសីតុណ្ហភាពក្តៅខ្លាំងបំផុតមិនធ្លាប់មានក្នុងរដូវរងា និងខែមិថុនា និងកក្កដាក្តៅបំផុតមិនធ្លាប់មាន ចាប់តាំងពីការចាប់ផ្តើមប្រមូលទិន្នន័យអាកាសធាតុនៅឆ្នាំ១៩៦០។ សីតុណ្ហភាពជុំវិញទីក្រុងអាថែន ត្រូវបានព្យាករថានឹងឡើងដល់ ៣៩ អង្សាសេនៅថ្ងៃចន្ទ ជាមួយនឹងខ្យល់បក់បោកដល់ទៅ ៥០គីឡូម៉ែត្រក្នុងមួយម៉ោង៕