(ឡង់ដ៍)៖ ប៉ូលិសអង់គ្លេស នៅថ្ងៃពុធនេះបានដាក់កម្លាំងបន្ថែម ដើម្បីត្រៀមបង្ក្រាបក្រុមបាតុករប្រឆាំងជនមូស្លីម និងជនអន្តោប្រវេសន៍ ខណៈដែលស្ថានការណ៍នៅក្នុងប្រទេសកាន់តែក្តៅគគុក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០៧ ខែសីហា ឆ្នាំ២០២៤។
រដ្ឋាភិបាលបានបង្កើនកម្លាំងប៉ូលិសជំនាញរហូតដល់ ៦,០០០នាក់ ដើម្បីឆ្លើយតបទៅនឹងអំពើហិង្សាណាមួយដែលអាចកើតឡើង ហើយនិយាយថា ពួកគេនឹងមានវត្តមានច្រើនល្មមដើម្បីដោះស្រាយអសន្តិសុខណាមួយ។
លោក Mark Rowley ប្រធានប៉ូលិសទីក្រុងឡុងដ៍ បាននិយាយថា មន្ត្រីនៅទីតាំងយុទ្ធសាស្ត្រសំខាន់ៗនឹងអាចសម្របខ្លួនបានយ៉ាងរហ័ស ដោយបន្ថែមថា ផែនការរបស់ប៉ូលិសត្រូវបានផ្អែកលើបញ្ជី នៃគោលដៅដែលអាចកើតមាន ប៉ុន្តែពួកគេក៏ត្រៀមខ្លួនសម្រាប់ព្រឹត្តិការណ៍ផ្សេងទៀតផងដែរ។
លោកបានប្រាប់អ្នកសារព័ត៌មានយ៉ាងដូច្នេះថា «នោះហើយជាមូលហេតុដែលយើងមានមន្ត្រីរាប់ពាន់នាក់នៅយប់នេះ។ យើងនឹងការពារមនុស្សទាំងនោះ។ វាមិនអាចទទួលយកបានទេ ក្នុងការបំភិតបំភ័យណាមួយនៃសកម្មភាពស្របច្បាប់ ហើយយើងនឹងមិនអនុញ្ញាតឱ្យប្រព័ន្ធអន្តោប្រវេសន៍ត្រូវបានគំរាមកំហែងឡើយ»។
ទន្ទឹមនឹងនេះ លោក Stephen Parkinson នាយកការិយាល័យព្រះរាជអាជ្ញាសាធារណៈ បានសម្តែងការព្រួយបារម្ភយ៉ាងខ្លាំង ចំពោះការចូលរួមរបស់កុមារ ដែលអាចប្រឈមនឹងផលវិបាកធ្ងន់ធ្ងរនៅពេលអនាគត ដោយសារតែសកម្មភាពហិង្សាទាំងនេះ។
គួរបញ្ជាក់ថា រលកអំពើហិង្សានេះបានផ្ទុះឡើងកាលពីដើមសប្តាហ៍មុន បន្ទាប់ពីក្មេងស្រីបីនាក់ត្រូវបានសម្លាប់ នៅក្នុងការវាយប្រហារដោយកាំបិតនៅ Southport ភាគពាយ័ព្យប្រទេសអង់គ្លេស។ ក្រុមស្តាំនិយមជ្រុលបានទាញយកផលប្រយោជន៍ពីករណីនេះ ដោយចោទប្រកាន់ថា ជនសង្ស័យជាជនអន្តោប្រវេសន៍មូស្លីម បើទោះបីជាព័ត៌មាននេះមិនត្រឹមត្រូវក៏ដោយ។ ពួកគេបានប្រើប្រាស់បណ្តាញសង្គមដើម្បីផ្សព្វផ្សាយព័ត៌មានមិនពិត និងបង្កើនកំហឹងក្នុងសង្គម។
ក្រុមហ៊ុនមេធាវីជំនាញខាងអន្តោប្រវេសន៍ និងមជ្ឈមណ្ឌលគាំទ្រជនអន្តោប្រវេសន៍បានបិទទ្វារជាបណ្តោះអាសន្ន ដើម្បីការពារបុគ្គលិករបស់ពួកគេ។ សេវាគ្រូពេទ្យគ្រួសារមួយចំនួន នៅក្នុងតំបន់ដែលរងផលប៉ះពាល់ដោយការតវ៉ា ក៏បានប្រកាសបិទទ្វារមុនម៉ោងធ្វើការផងដែរ។
ការណែនាំរបស់ប៉ូលិស និងព័ត៌មានពីក្រុម WhatsApp ក្នុងសង្កាត់ កំពុងត្រូវបានផ្សព្វផ្សាយនៅលើបណ្តាញសង្គម ដោយលម្អិតពីតំបន់ដែលគួរជៀសវាង។
អង្គការ Asylum Link Merseyside ដែលគាំទ្រដល់អ្នកស្វែងរកសិទ្ធិជ្រកកោន និងជនភៀសខ្លួននៅទីក្រុង Liverpool បាននិយាយថា អគាររបស់ខ្លួនត្រូវបានបិទ ហើយនឹងមិនទទួលយកអ្នកចំណូលថ្មីណាមួយឡើយ។ អង្គការនេះបានបញ្ជាក់ថា «បុគ្គលិករបស់យើងកំពុងធ្វើការលើការធានាសុវត្ថិភាពអគារនេះ»៕
