(ដាក្កា)៖ ប្រព័ន្ធផ្សព្វផ្សាយក្នុងស្រុកបង់ក្លាដែស បានរាយការណ៍ថា នៅថ្ងៃចន្ទនេះ នាយករដ្ឋមន្រ្តីបង់ក្លាដែស លោកស្រី Sheikh Hasina បានលាលែងពីតំណែង និងភៀសខ្លួនចេញពីប្រទេសថែមទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី៥ ខែសីហា ឆ្នាំ២០២៤។

ការលាលែងពីតំណែង និងរត់ចេញពីប្រទេសនេះ កើតមានឡើង ចំពេលមានការធ្​វើបាតុកម្មផ្ទុះជាអំពើហិង្សា ទាមទារឱ្យលោកស្រី ចុះចេញពីអំណាច។ បើតាមសេចក្តីរាយការណ៍ព័ត៌មាន លោកស្រី Hasina បានភៀសខ្លួនចេញពីបង់ក្លាដែសតាមឧទ្ធម្ភាគចក្រ ដើម្បីឆ្ពោះទៅកាន់ប្រទេសឥណ្ឌា ខណៈក្រុមបាតុកម្មបានសម្រុកចូលដល់ វិមាននាយករដ្ឋមន្រ្តីរបស់លោកស្រី។ មនុស្សប្រមាណជិត ១០០នាក់បានស្លាប់ និងរាប់រយនាក់បានរងរបួស ក្នុងការប៉ះទង្គិចគ្នារវាងក្រុមបាតុករ និងកងកម្លាំងសន្តិសុខ កាលពីថ្ងៃអាទិត្យ​កន្លងទៅ។

គួរបញ្ជាក់ថា លោក Sheikh Hasina បានបន្តជាប់ឆ្នោតសម្រាប់អាណត្តិទី៥ កាលពីខែមករា ដើមឆ្នាំនេះ។ លោកស្រី កាន់តួនាទីជា នាយករដ្ឋមន្រ្តីលើកដំបូង ចាប់ពីឆ្នាំ១៩៩៦ ដល់ឆ្នាំ២០០១ និងចាប់ពីឆ្នាំ២០០៩ រហូតមកទល់បច្ចុប្បន្ន៕