(កៀវ)៖ ក្រសួងការបរទេសអ៊ុយក្រែន បានប្រកាសថា លោករដ្ឋមន្រ្តី Dmytro Kuleba នឹងបំពេញទស្សនកិច្ចនៅប្រទេសអាហ្រ្វិកចំនួន ៣ក្នុងសប្តាហ៍នេះ ដែលជាផ្នែកមួយនៃកិច្ចខិតខំប្រឹងប្រែង ដើម្បីជំរុញការគាំទ្រសម្រាប់ទីក្រុងកៀវ ក្នុងសង្រ្គាមប្រឆាំងរុស្ស៉ី។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី៥ ខែសីហា ឆ្នាំ ២០២៤។

នៅក្នុង​ដំណើរ​ទស្សនកិច្ច​ការទូត​លើក​ទី​ ៤​របស់​លោក​ទៅ​អាហ្វ្រិក ​នារយៈពេល​ ២​ឆ្នាំ​ចុង​ក្រោយ​នេះ លោក Kuleba ត្រូវទៅកាន់ប្រទេសម៉ាឡាវី សំប៊ី និងម៉ូរីស ចាប់ពីថ្ងៃទី៤ ខែសីហា ដល់ថ្ងៃទី៨ ខែសីហា ឆ្នាំ ២០២៤។ តាមសេចក្តីថ្លែងការណ៍របស់ក្រសួងការបរទេស «រាល់កិច្ចប្រជុំទាំងអស់ នឹងផ្តោតលើការអភិវឌ្ឍទំនាក់ទំនងទ្វេរភាគី ផ្អែកលើការគោរពគ្នា និងផលប្រយោជន៍ទៅវិញទៅមក។ នៅក្នុងចំណោមប្រធានបទគន្លឹះ នឹងរួមមានការចូលរួមពីបណ្តារដ្ឋអាហ្រ្វិកក្នុងកិច្ចខិតខំប្រឹងប្រែងជាសកល ដើម្បីស្តារសន្តិភាពសម្រាប់អ៊ុយក្រែន និងសម្រាប់ពិភពលោក»។ លោក Kuleba ក៏នឹងពិភាក្សាផងដែរ អំពីការ​ផ្គត់ផ្គង់​គ្រាប់​ធញ្ញជាតិ​របស់អ៊ុយក្រែន​ដល់​តំបន់អាហ្វ្រិក និង​ការ​ចូល​រួម​ពី​ក្រុមហ៊ុន​អាហ្រ្វិក​ក្នុង​ការ​កសាង​អ៊ុយក្រែនឡើងវិញ។

គួរបញ្ជាក់ថា មានប្រទេសអាហ្វ្រិកមួយចំនួន បានរួមក្នុងសន្និសីទស្តីពីសន្តិភាពអ៊ុយក្រែន កាលពីខែមិថុនា នៅប្រទេសស្វីស ប៉ុន្តែពួកគេភាគច្រើនមានភាពស្ទាក់ស្ទើរ ក្នុងការចូលរួមកិច្ចខិតខំប្រឹងប្រែងរបស់លោកខាងលិច ដើម្បីធ្វើឱ្យរុស្ស៉ីឯកោ ពីឋានៈជាអ្នកផ្គត់ផ្គង់ថាមពល និងទំនិញដ៏សំខាន់៕