(ព្យុងយ៉ាង)៖ ប្រព័ន្ធផ្សព្វផ្សាយរដ្ឋកូរ៉េខាងជើង បានរាយការណ៍ នៅថ្ងៃចន្ទ ទី៥ ខែសីហា ឆ្នាំ ២០២៤នេះថា មេដឹកនាំលោក គីម ជុងអ៊ុន បានចុះពិនិត្យការបញ្ជូនមីស៉ីលបាលីស្ទីគចំនួន ២៥០គ្រាប់ទៅកាន់អង្គភាពជួរមុខ នៅតាមព្រំដែនភាគខាងត្បូង។ នេះបើយោងតាមការចេញផ្សាយដោយទីភ្នាក់ងារសារព័តមាន AFP។

KCNA បានរាយការណ៍ថា ពិធី​បញ្ជូន​មីស៉ីល​បាលីស្ទិគស៊េរី​​ថ្មី​ចំនួន ២៥០គ្រាប់ទៅ​ឱ្យអង្គភាព​យោធា​ព្រំដែន​ ​ប្រព្រឹត្ត​ទៅ​ក្នុង​រដ្ឋធានី​ព្យុងយ៉ាង​​​ កាលពី​ថ្ងៃ​អាទិត្យចុងសប្តាហ៍ ក្រោមអធិបតីភាពរបស់ លោក គីម។ លោក គីម ត្រូវបានដកស្រង់សម្តីពីការថ្លែងសុន្ទរកថា នៅឯពិធីនោះថា «មីស៉ីលដែលបញ្ជូនទៅ គឺជាអាវុធយុទ្ធសាស្ត្រដ៏ទាន់សម័យ រចនាឡើងដោយរូបលោកផ្ទាល់»។ លោក គីម បានថ្លែងទៀតថា ការបង្ហាញអាវុធថ្មីៗ ក្នុងពេលដែលប្រទេសកំពុងងើបឡើងវិញពីការខូចខាតដោយទឹកជំនន់គឺជា «ការបង្ហាញនូវឆន្ទៈដ៏ម៉ឺងម៉ាត់របស់គណបក្សកាន់អំណាច ក្នុងការជំរុញការពង្រឹងសមត្ថភាពការពារជាតិ»។

គួរបញ្ជាក់ថា ទំនាក់ទំនងរវាងកូរ៉េខាងជើង និងកូរ៉េខាងត្បូងកាន់តែធ្លាក់ចុះក្នុងរយៈពេលប៉ុន្មានឆ្នាំមកនេះ ដោយកូរ៉េខាងជើងបង្កើនការសាកល្បងអាវុធ និងបញ្ជូនបាឡុងសំរាមចូលមកកូរ៉េខាងត្បូង។ ជាការឆ្លើយតប កូរ៉េខាងត្បូង បានបន្ត​ការផ្សាយ​ឃោសនា​តាម​ព្រំដែន​ ​ផ្អាក​កិច្ចព្រមព្រៀង​យោធា​ដែលកាត់បន្ថយ​ភាព​តានតឹង​ និង​ចាប់ផ្តើមធ្វើ​សមយុទ្ធ​បាញ់​គ្រាប់​ពិត​នៅ​ក្បែរព្រំដែនជាដើម៕