(កៀវ)៖ យោធាអ៊ុយក្រែន កាលពីថ្ងៃសៅរ៍ ទី៣ ខែសីហា បានអះអាងថាខ្លួនបានបាញ់ពន្លិចនាវាមុជទឹកមួយគ្រឿងរបស់រុស្ស៉ី ព្រមទាំងបានបង្កការខូចខាតដល់ ប្រព័ន្ធការពារដែនអាកាស S-400 ក្នុងតំបន់គ្រីមៀ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុងសេចក្ដីថ្លែងការណ៍មួយ អគ្គសេនាធិការកងកម្លាំងប្រដាប់អាវុធអ៊ុយក្រែន បាននិយាយថានាវាមុជទឹករុស្ស៉ី Rostov-on-Don ត្រូវបានវាយប្រហារនៅឯ ទីក្រុងកំពង់ផែ Sevastopol កាលពីថ្ងៃសុក្រ ដោយបណ្ដាលឱ្យលិច។ អគ្គសេនាធិការអ៊ុយក្រែនមិនបានផ្ដល់ព័ត៌មានអ្វីលម្អិតទេ ហើយបន្ថែមទៀតថាយានទម្រ បាញ់របស់ប្រព័ន្ធការពារដែនអាកាស S-400 ចំនួន៤គ្រឿងក៏រងការខូចខាតផងដែរ។

គួរបញ្ជាក់ថា ត្រូវបានដាក់ឱ្យប្រើប្រាស់ក្នុងឆ្នាំ២០១៤ នាវាមុជទឹក Rostov-on-Don ជាប្រភេទនាវាមុជទឹកក្នុងត្រកូល Kilo II-class ដែលមានប្រវែង ៧៣.៨ម៉ែត្រ និងអាចផ្ទុកនាវិក៥២នាក់ រួមទាំងអាចបំពាក់មីស៊ីលគ្រូស Kalibr។ តែយ៉ាងណា ខាងក្រសួងការពារជាតិរុស្ស៉ី មិនបានធ្វើអត្ថាធិប្បាយអ្វីជុំវិញការអះអាងរបស់ យោធាអ៊ុយក្រែននោះទេ៕