(ហ៊្សេរុយសាឡិម)៖ យោធាអ៉ីស្រាអែលនាថ្ងៃព្រហស្បតិ៍នេះ បានឱ្យដឹងថា មេដឹកនាំកងកម្លាំងយោធារបស់ ក្រុមហាម៉ាសប៉ាឡេស្ទីន លោក Mohammed Deif ពិតជាបានបាត់បង់ជីវិតប្រាកដមែន ក្នុងការវាយប្រហារតាមផ្លូវអាកាសមួយ របស់អ៉ីស្រាអែល កាលពី​ខែកក្កដាកន្លងទៅ នៅឯតំបន់ហ្កាហ្សាស្រ្ទីប (Gaza Strip)។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នា​ថ្ងៃព្រហស្បតិ៍ ទី១ ខែសីហា ឆ្នាំ២០២៤។

យោធាអ៉ីស្រាអែលបាននិយាយយ៉ាងដូច្នេះថា «កងកម្លាំងការពារជាតិអ៉ីស្រាអែល IDF បានប្រកាសថា កាលពីថ្ងៃទី១៣ ខែកក្កដា កងយន្តហោះចម្បាំងរបស់ IDF បានវាយប្រហារតំបន់មួយ ក្នុងទីក្រុង Khan Yunis ភាគខាងត្បូងតំបន់ Gaza ហើយបន្ទាប់ពី​ការវាយតម្លៃយ៉ាងល្អិតល្អន់លើព័ត៌មានសម្ងាត់ វាអាចជឿជាក់បាន១០០ភាគរយថា Mohammed Deif ពិតជាត្រូវបានសម្លាប់ ក្នុងការវាយប្រហារ នាពេលនោះ»។

លោក Deif ត្រូវបានអ៉ីស្រាអែលជឿថា ស្ថិតក្នុងចំណោមេខ្លោងរៀបចំផែនការ វាយប្រហាររបស់ក្រុមហាម៉ាស កាលពីថ្ងៃទី៧ ខែតុលា ឆ្នាំ២០២៣ មកលើភាគខាងត្បូងអ៉ីស្រាអែល ដែលជាសកម្មភាពបង្កឱ្យផ្ទុះសង្រ្គាមដ៏បង្ហូរឈាមនៅ Gaza ដែលគិតមក​ទល់ពេលនេះ មានរយៈពេលប្រមាណ៣០០ថ្ងៃហើយ។

គួរបញ្ជាក់ថា កាលពីថ្ងៃពុធសប្តាហ៍នេះ លោក Ismail Haniyeh ដែលជាមេដឹកនាំនយោបាយរបស់ហាម៉ាស ទើបតែត្រូវបានគេធ្វើឃាត នៅទីក្រុងតេហេរ៉ង់នៃប្រទេសអ៉ីរ៉ង់ ប៉ុន្មានម៉ោង ក្រោយលោកចូលរួម ពីធីស្បថចូលកាន់តំណែង របស់ប្រធានាធិបតីអ៉ីរ៉ង់ថ្មី។ អ៉ីស្រាអែល មិនបានចេញមុខអះអាងថា ការធ្វើឃាតនោះ គឺជាទង្វើរបស់ខ្លួន ឬក៏យ៉ាងណាទេ ប៉ុន្តែអ៉ីរ៉ង់និងក្រុមហាម៉ាស បានចោទប្រកាន់លើអ៉ីស្រាអែល ហើយព្រមានធ្វើសកម្មភាពសងសឹក៕