(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា អ៊ុយក្រែននិងពិភពលោកទាំងមូល ចង់ឃើញរុស្ស៉ី ចូលរួមក្នុងវេទិកាអន្តរជាតិនានា ដែលមានគោលដៅស្វែងរកទីបញ្ចប់ សម្រាប់សង្រ្គាមអូសបន្លាយនៅអ៊ុយក្រែន។ នេះបើតាមការ​ចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី១ ខែសីហា ឆ្នាំ២០២៤។

លោក ហ្សេលេនស្គី បានលើកឡើងថា «ភាគច្រើននៃពិភពលោកនាពេលនេះ ចង់ឱ្យរុស្ស៉ីចាំបាច់ត្រូវតែមានវត្តមាន នៅ​កិច្ចប្រជុំសន្តិភាពលើកទី២ ក្រោមហេតុផលថា បើពុំដូច្នោះទេ យើងនឹងមិនអាចសម្រេចបានលទ្ធផល ដែលមានអត្ថន័យណាមួយឡើយ។ ដោយសារតែពិភពលោកទាំងមូល ចង់ឱ្យរុស្ស៉ីមានវត្តមានយ៉ាងដូច្នេះ ពួកយើងផ្ទាល់មិនអាចជំទាស់បានទេ»។ លោក ហ្សេលេនស្គី បានធ្វើការអត្ថាធិប្បាយបែបនេះ ប្រាប់ AFP និងប្រព័ន្ធផ្សព្វផ្សាយបារាំងដទៃទៀត អំឡុងកិច្ចសម្ភាសមួយ កាលពីថ្ងៃអង្គារសប្តាហ៍នេះ នៅភាគខាងលិចអ៊ុយក្រែន។

គួរបញ្ជាក់ថា មេដឹកនាំនិងមន្រ្តីជាន់ខ្ពស់មកពីប្រទេសជាង៩០ បានទៅប្រមូលផ្តុំគ្នានៅប្រទេសស្វីស កាលពីខែមិថុនា ដើម្បីចូលរួម​កិច្ច​ប្រជុំលើកដំបូង ស្តីពីសន្តិភាពអ៊ុយក្រែន ដែលរុស្ស៉ីចាត់ទុកជា ការចំណាយពេលឥតប្រយោជន៍ ដ្បិតខ្លួនដែលជាភាគីជម្លោះផ្ទាល់ មិនត្រូវបានអញ្ជើញឱ្យចូលរួម។ ប៉ុន្តែចាប់តាំងពីពេលនោះមក លោក ហ្សេលេនស្គី បានបង្ហាញតំរុយថា ទីក្រុងមូស្គូគួរតែមានតំណាង​ចូលរួមកិច្ចប្រជុំសន្តិភាពលើកទី២ ដែលគ្រោងធ្វើឡើងក្នុងឆ្នាំនេះ ខណៈវាគឺជាផ្លាស់ប្តូរគោលជំហរ បន្ទាប់ពីទីក្រុងកៀវបានប្រកាន់យ៉ាងម៉ឺងម៉ាត់ មិនឱ្យទីក្រុងមូស្គូចូលរួមកិច្ចប្រជុំលើកទី១៕