(តេហេរ៉ង់)៖ ប្រធានាធិបតីអ៉ីរ៉ង់ លោក Masoud Pezeshkian នៅថ្ងៃពុធនេះ បានប្តេជ្ញាថា នឹងធ្វើឱ្យអ៉ីស្រាអែលស្តាយក្រោយ ចំពោះសកម្មភាពវាយប្រហារធ្វើឃាត លើមេដឹកនាំនយោបាយ របស់ក្រុមហាម៉ាសប៉ាឡេស្ទីន គឺលោក Ismail Haniyeh នៅ​ទីក្រុងតេហេរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃពុធ ទី៣១​ ខែកក្កដា ឆ្នាំ២០២៤។

លោក Pezeshkian បាននិយាយថា អ៉ីរ៉ង់នឹងការពារបូរណភាពទឹកដី កិត្តិយស ក៏ដូចជាសេចក្តីថ្លៃថ្នូររបស់ខ្លួន ហើយធ្វើឱ្យអ៉ីស្រាអែល ស្តាយក្រោយចំពោះសកម្មភាពដ៏កំសាករបស់ពួកគេ។ ចំណែកឯ មេដឹកនាំកំពូលអ៉ីរ៉ង់ លោក Ayatollah Ali Khamenei ក៏បានប្តេជ្ញាដាក់ទោសឱ្យធ្ងន់លើអ៉ីស្រាអែលផងដែរ សម្រាប់ការធ្វើឃាតលោក Haniyeh ព្រោះវាគឺជាភារកិច្ច​របស់អ៉ីរ៉ង់ ដើម្បីសងសឹកគំនុំឈាមនេះ ដ្បិតលោក Haniyeh ត្រូវគេសម្លាប់នៅលើទឹកដីអ៉ីរ៉ង់។

គួរបញ្ជាក់ថា បើតាមប្រព័ន្ធផ្សព្វផ្សាយអ៉ីរ៉ង់ លោក Ismail Haniyeh បានស្លាប់ក្នុងការវាយប្រហារតាមផ្លូវអាកាស នៅទីក្រុងតេហេរ៉ង់ បន្ទាប់ពីរូបលោកបានមកចូលរួម ពិធីស្បថចូលកាន់អំណាចរបស់លោក Pezeshkian កាលពីថ្ងៃអង្គារសប្តាហ៍នេះ៕