(សេអ៊ូល)៖ កូនស្រីសំណព្វរបស់មេដឹកនាំកូរ៉េខាងជើង លោក គីម ជុងអ៊ុន កំពុងទទួលបានការបណ្ដុះបណ្ដាលពីរបៀបដឹកនាំប្រទេស នៅក្រោមការលើកតម្កើងយ៉ាងឆាប់រហ័ស សម្រាប់ក្មេងស្រីរូបនេះដែលបានបង្ហាញខ្លួនជាសាធារណៈកាលពីជាង២ឆ្នាំមុន។ នេះបើតាមចារកម្មកូរ៉េខាងត្បូង ដកស្រង់ចេញផ្សាយដោយទីភ្នាក់ងារសារព័ត៌មាន Bloomberg។

ទីភ្នាក់ងារស៊ើបការណ៍សម្ងាត់កូរ៉េខាងត្បូង National Intelligence Service ឬ​ NIS​ បានប្រាប់សមាជិកសភាក្នុងសម័យប្រជុំបិទទ្វារកាលពីថ្ងៃចន្ទ ទី២៩ ខែកក្កដាថាក្មេងស្រី Ju Ae ដែលត្រូវបានប្រព័ន្ធផ្សព្វផ្សាយកូរ៉េខាងជើង ចាត់ទុកថាជាកូនស្រីសំណព្វ និងគួរឱ្យគោរពរបស់លោក គីម ជុងអ៊ុន គឺជាបេក្ខជនម្នាក់ដែលនឹងក្លាយជាអ្នកបន្តវេនបន្ទាប់ នៅក្នុង គ្រួសារគីម ដែលបានដឹកនាំប្រទេសចាប់តាំងពីទសវត្សរ៍ឆ្នាំ១៩៤០មក។

លោក Lee Seong-kweun ជាសមាជិកសភាមកពីគណបក្សកាន់អំណាច People Power Party ក៏បានប្រាប់អ្នកសារព័ត៌មានក្រោយចប់សម័យប្រជុំសភាដែរថា «កូរ៉េខាងជើង បានជ្រើសរើស Kim Ju Ae ជាបេក្ខជនបន្តវេននៅក្នុងពេលនេះ និងកំពុងរៀនសូត្រពីរបៀបដឹកនាំប្រទេសបន្តពីឪពុក»។

គួរបញ្ជាក់ថា ក្មេងស្រី Kim Ju Ae បានបង្ហាញខ្លួនជាលើកដំបូងកាលពីខែវិច្ឆិកា ឆ្នាំ២០២២ ដោយពាក់អាវធំពណ៌ស និងកាន់ដៃឪពុក គឺលោក គីម ជុងអ៊ុន ដើរនៅខាងមុខ មីស៊ីលបាលិស្ទីគអន្តរទ្វីបនុយក្លេអ៊ែរដែលក្រុមអ្នកជំនាញជឿថាអាចវាយប្រហារលើសហរដ្ឋអាមេរិក។ ចាប់តាំងពីពេលនោះមក ក្មេងស្រី Ju Ae តែងតែទៅតាមឪពុកជានិច្ច ដូចជានៅឯទីតាំងធ្វើតេស្ដមីស៊ីល ឬព្រឹត្តិការណ៍សំខាន់ផ្សេងនៅកូរ៉េខាងជើង៕