(ប៉េកាំង)៖ នៅថ្ងៃចន្ទនេះ ចិនបានចេញមុខចូលរួមសម្តែងការអបអរសាទរ ទៅកាន់ប្រធានាធិបតីវ៉េណេស៊ុយអេឡា លោក Nicolas Maduro សម្រាប់ការបន្តជាប់ឆ្នោតអាណត្តិទី៣ ក្នុងការបោះឆ្នោតជ្រើសរើសប្រធានាធិបតី ដែលលទ្ធផលត្រូវបានបដិសេធ ដោយ​គណបក្សប្រឆាំងនៅក្នុងប្រទេសផ្ទាល់ ព្រមទាំងដោយប្រទេសមួយចំនួន នៅក្នុងតំបន់។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP នាថ្ងៃចន្ទ ទី២៩ ខែកក្កដា ឆ្នាំ២០២៤។

លោក Lin Jian អ្នកនាំពាក្យក្រសួងការបរទេសចិន បាននិយាយយ៉ាងដូច្នេះថា «ចិនឈរត្រៀមខ្លួនរួចជាស្រេច ដើម្បីបន្តជំរុញ ភាពជាដៃគូយុទ្ធសាស្រ្តគ្រប់ជ្រុងជ្រោយរបស់យើងថែមទៀត និងធ្វើឱ្យកាន់តែប្រសើរនូវអត្ថប្រយោជន៍ សម្រាប់ប្រជាជននៃប្រទេសទាំងពីរ»។ ការអបអរសាទររបស់ទីក្រុងប៉េកាំងធ្វើឡើង បន្ទាប់ពីរដ្ឋមន្រ្តីការបរទេសអាមេរិក លោក Antony Blinken បានបង្ហាញចេញនូវក្តីបារម្ភថា លទ្ធផលបោះឆ្នោតប្រធានាធិបតីវ៉េណេស៊ុយអេឡា គឺមិនត្រឹមត្រូវ ហើយអំពាវនាវឱ្យការរាប់សន្លឹកឆ្នោត ​មានយុត្តិធម៌និងតម្លាភាព។

គួរបញ្ជាក់ថា យោងតាមសេចក្តីប្រកាស របស់គណៈកម្មការរៀបចំការបោះឆ្នោតវ៉េណេស៊ុយអេឡា លោក Maduro បានបន្តជាប់​ជាប្រធានាធិបតីសម្រាប់អាណត្តិទី៣ ជាមួយសំឡេងគាំទ្រ៥១.២ភាគរយ។ យ៉ាងណាមិញ ក្រុមប្រឆាំងបានបដិសេធទទួលស្គាល់ ជ័យជម្នះរបស់លោក Maduro ដោយអះអាងថា បេក្ខជនរបស់ពួកគេឯណោះទេ ទើបជាអ្នកឈ្នះជាមួយសំឡេងគាំទ្រដល់ទៅ៧០ភាគរយ។ បើតាមគណៈកម្មការបោះឆ្នោត បេក្ខជនរបស់ក្រុមប្រឆាំង លោក Edmundo Gonzalez Urrutia ទទួលបានសំឡេងគាំទ្រ ត្រឹម៤៤.២ភាគរយ។ រីឯបណ្តាប្រទេសមួយចំនួនក្នុងតំបន់ ដូចជាស៉ីលី កូស្តារីកា និងប៉េរូ ជាដើម ក៏បានបង្ហាញមន្ទិលសង្ស័យ ចំពោះលទ្ធផលបោះឆ្នោតប្រធានាធិបតីវ៉េណេស៊ុយអេឡា ផងដែរ៕