(សេអ៊ូល)៖ មេដឹកនាំកូរ៉េខាងជើង​ លោក គីម ជុងអ៊ុន បាននិយាយថាវាគឺជាបេសកកម្មដ៏ពិសិដ្ឋមួយរបស់អ្នកជំនាន់បច្ចុប្បន្ន ដើម្បីកសាង «ឋានសួគ៌សម្រាប់ប្រជាជន» ផ្អែកលើមនោគមន៍វិជ្ជា បន្សល់ទុកដោយអ្នកជំនាន់មុន ដែលសម្រេចបាននូវជ័យជម្នះជាមួយការពលីឈាមស្រស់។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters។

ការកត់សម្គាល់ខាងលើរបស់លោក គីម ជុងអ៊ុន ធ្វើឡើងនាឱកាសដែលកូរ៉េខាងជើង ប្រារព្ធខួបអនុស្សាវរីយសង្រ្គាមកូរ៉េនៅថ្ងៃទី២៧ ខែកក្កដានេះ និងអំឡុងធ្វើទស្សនកិច្ច កាលពីថ្ងៃសុក្រ ទី២៦ ខែកក្កដា ទៅកាន់​ស្ដូប​គោរព​វិញ្ញាណក្ខន្ធ​អតីតយុទ្ធជនសង្រ្គាមកូរ៉េឆ្នាំ១៩៥០-១៩៥៣ រួមទាំងធ្វើដំណើរទៅកាន់ប៉មមិត្តភាពចងចាំវីរភាពរបស់ កងទ័ពរំដោះប្រជាជនចិន ដែលបានចូលជួយកូរ៉េខាងជើងក្នុងសង្រ្គាមនេះ។

ប្រព័ន្ធផ្សព្វផ្សាយរដ្ឋ​ KCNA បានគូសបញ្ជាក់ដូច្នេះថា «សមមិត្តគីម ជុងអ៊ុន បាននិយាយថាវាគឺជាបេសកកម្មដ៏ពិសិដ្ឋ និងជាភារកិច្ចរបស់ជំនាន់របស់យើងដើម្បីការពារ មនោគមន៍វិជ្ជា និងប្រព័ន្ធដែលបន្សល់ទុកដោយអ្នកជំនាន់មុនដែលទទួលបានជោគជ័យក្នុងសង្រ្គាមជាមួយការពលីឈាមស្រស់ ... និងដើម្បីកសាងឋានសួគ៌មួយ សម្រាប់ប្រជាជន»។

គួរបញ្ជាក់ថា កូរ៉េខាងជើង បានចាត់ទុកថ្ងៃទី២៧ ខែកក្កដា គឺជាទិវាជ័យជម្នះ នៅក្នុងសង្រ្គាមប្រឆាំងនឹងកូរ៉េខាងត្បូងគាំទ្រដោយសហរដ្ឋអាមេរិក ឆ្នាំ១៩៥០-១៩៥៣ បើទោះជាសង្រ្គាមនេះបញ្ចប់ទៅជាមួយបទឈប់បាញ់មួយ ពុះចែកប្រទេសកូរ៉េជា២ក៏ដោយ។ ប៉ុន្តែ នៅកូរ៉េខាងត្បូងវិញ មិនមានការរៀបចំពិធី ឬព្រឹត្តិការណ៍ធំដុំដើម្បី រំឮកទិវានេះនោះឡើយ៕