(ហុងកុង)៖ រដ្ឋមន្រ្តីការបរទេសអ៊ុយក្រែន លោក Dmytro Kuleba បានបំពេញទស្សនកិច្ចមកកាន់ទីក្រុងហុងកុង កាលពីថ្ងៃព្រហស្បតិ៍សប្តាហ៍នេះ ហើយបានអំពាវនាវឱ្យមេដឹកនាំហុងកុង លោក John Lee ទប់ស្កាត់កុំឱ្យរុស្ស៉ីអាចប្រើប្រាស់​ហុងកុងជាមធ្យោបាយ ដើម្បីគេចវេះទណ្ឌកម្មរបស់ក្រុមប្រទេសលោកខាងលិច ដែលបានដាក់លើទីក្រុងមូស្គូ ដោយសារសង្រ្គាមឈ្លានពាន​នៅអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី២៦ ខែកក្កដា ឆ្នាំ២០២៤។

ទាំងហុងកុងនិងប្រទេសចិន ត្រូវបានរដ្ឋាភិបាលអាមេរិក មើលឃើញជា ច្រកផ្លូវដ៏សំខាន់របស់រុស្ស៉ី ដើម្បីទទួលបានវត្ថុធាតុដើម សម្រាប់យោធារបស់ខ្លួន រួមមានទាំងបន្ទះឈីប និងសមាសធាតុផ្សំសម្រាប់ដ្រូន។ ក្រសួងការបរទេសអ៊ុយក្រែន បាននិយាយ​ក្នុងសេចក្តីថ្លែងការណ៍ថា «លោក Dmytro Kuleba បានអំពាវនាវឱ្យរដ្ឋបាលហុងកុង ចាត់វិធានការដើម្បីរារាំងរុស្ស៉ី​ ក៏ដូចជាក្រុមហ៊ុនរុស្ស៉ីនានា នូវឱកាសក្នុងការប្រើប្រាស់ទីក្រុងនេះ ដើម្បីគេចវេះចំណាត់ការរឹតត្បិត ដែលត្រូវបានដាក់ពាក់ព័ន្ធ​សង្រ្គាមឈ្លានពានរបស់រុស្ស៉ី នៅអ៊ុយក្រែន»។

ក្នុងសារអ៉ីម៉ែលឆ្លើយតបមកកាន់ទីភ្នាក់ងារព័ត៌មាន Reuters រដ្ឋបាលទីក្រុងហុងកុង បាននិយាយថា ខ្លួនអនុវត្តយ៉ាងខ្ជាប់ខ្ជួន នូវទណ្ឌកម្មរបស់ក្រុមប្រឹក្សាសន្តិសុខ នៃអង្គការសហប្រជាជាតិ (UN)។ ពីមុនមក ហុងកុងធ្លាប់បានអះអាងថា ខ្លួនមិនអនុវត្ត​ទណ្ឌកម្មលក្ខណៈឯកតោភាគី របស់ប្រទេសដទៃឡើយ ប៉ុន្តែអនុវត្តយ៉ាងរឹងមាំបំផុត នូវទណ្ឌកម្មរបស់ក្រុមប្រឹក្សាសន្តិសុខរបស់ UN ដោយស្របទៅតាមគោលការណ៍របស់ ក្រសួងការបរទេសនៃប្រទេសចិន។

គួរបញ្ជាក់ថា លោក Kuleba បានធ្វើដំណើរមកកាន់ទីក្រុងហុងកុង ក្រោយកិច្ចសន្ទនារយៈពេលជាង៣ម៉ោង ជាមួយរដ្ឋមន្រ្តីការបរទេសចិន លោក Wang Yi នៅទីក្រុងក្វាងចូវ កាលពីថ្ងៃពុធសប្តាហ៍នេះ ដែលបានផ្តោតទៅលើ​មធ្យោបាយដើម្បីបញ្ចប់សង្រ្គាមរបស់រុស្ស៉ី នៅអ៊ុយក្រែន៕