(វ៉ាស៉ីនតោន)៖ អនុប្រធានាធិបតីសហរដ្ឋអាមេរិក លោកស្រី Kamala Harris បានជំរុញឱ្យនាយករដ្ឋមន្រ្តីអ៉ីស្រាអែល លោក Benjamin Netanyahu ជួយសម្រេចឱ្យបាននូវកិច្ចព្រមព្រៀងបទឈប់បាញ់សម្រាប់តំបន់ហ្កាហ្សា ដោយនិយាយថា វានឹងអាចបន្ធូរបន្ថយការឈឺចាប់របស់ជនស៉ីវិលប៉ាឡេស្ទីន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៦ ខែកក្កដា ឆ្នាំ ២០២៤។

លោកស្រី Harris បានថ្លែងតាមកញ្ចក់ទូរទស្សន៍ បន្ទាប់ពីជូបគ្នាផ្ទាល់ជាមួយ លោក Netanyahu ថា «វាដល់ពេលដែលសង្រ្គាមនេះ ត្រូវបិទបញ្ចប់ហើយ»។ លោកស្រី Harris បានឱ្យដឹងទៀតថា «មានសកម្មភាពដែលអាចសង្ឃឹមបាន ​ក្នុង​ការ​ចរចា​ដើម្បី​ទទួល​បាន​ការឯកភាពគ្នា​លើកិច្ច​ព្រម​ព្រៀងមួយ​ ហើយ​ដូច​ដែល​ខ្ញុំ​បាន​ប្រាប់​លោកនាយក​រដ្ឋ​មន្ត្រី Netanyahu ថាវា​ដល់​ពេល​ហើយ​ដើម្បី​សម្រេច​បាន​នូវកិច្ច​ព្រម​ព្រៀង​នោះ»។

គួរបញ្ជាក់ថា នៅក្នុងយុទ្ធនាការឃោសនាបោះឆ្នោត កាលពីចុងសប្តាហ៍មុន លោក Harris ដែលទំនងជានឹងក្លាយជាបេក្ខជនប្រធានាធិបតី តំណាងឱ្យគណបក្សប្រជាធិបតេយ្យជំនួស លោក Biden ដែលដកខ្លួនចេញពីការប្រកួតនោះ មិនបានលើកឡើងពីវិបត្តិមនុស្សធម៌នៅតំបន់ហ្កាហ្សាទេ ប៉ុន្តែបញ្ជាក់ថា លោកស្រីនឹងមិននៅស្ងៀមឡើយ៕