(ប៉ូឡូញ)៖ ក្រុមអ្នកជួយសង្គ្រោះ កំពុងប្រឹងប្រែងជួយសង្គ្រោះអ្នករុករករ៉ែធ្យូងថ្មចំនួន ២៧នាក់ ដែលជាប់គាំងនៅក្រោមដី បន្ទាប់ពីរណ្តៅរ៉ែរបស់ពួកគេនៅភាគខាងត្បូងប្រទេសប៉ូឡូញ ត្រូវបានរងការវាយប្រហារដោយការរញ្ជួយដី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី១១ ខែកក្កដា ឆ្នាំ២០២៤។

ការរញ្ជួយដីនេះបានកើតឡើងនៅវេលាម៉ោង ៦ព្រឹក (ម៉ោងសកល) នៅជម្រៅប្រហែល ១,២០០ម៉ែត្រនៅក្រោមដីនៅរណ្តៅរ៉ែឈ្មោះ Rydultowy។ មានអ្នករុករករ៉ែចំនួន ៦៨នាក់នៅក្នុងតំបន់នៅពេលនោះ ប៉ុន្តែមាន៤១នាក់ត្រូវបាននាំយកមកលើផ្ទៃដីវិញដោយសុវត្ថិភាព និង ១៥នាក់ផ្សេងទៀតត្រូវបានបញ្ជូនទៅកាន់មន្ទីរពេទ្យ។

ក្រុមអ្នកជួយសង្គ្រោះជាង ១០ក្រុមកំពុងស្ថិតនៅនឹងកន្លែងកើតហេតុ ដើម្បីជួយអ្នករុករករ៉ែដែលនៅសេសសល់។ ទោះបីជាយ៉ាងណាក៏ដោយ ក្រុមជួយសង្គ្រោះនៅមិនទាន់អាចទាក់ទងជាមួយអ្នករុករករ៉ែពីរនាក់នៅឡើយទេ។

វីដេអូព័ត៌មានបានបង្ហាញឧទ្ធម្ភាគចក្រ និងរថសង្គ្រោះបន្ទាន់ជាច្រើននៅកន្លែងកើតហេតុ ដើម្បីជួយដឹកអ្នករុករករ៉ែដែលរងរបួស និងជួយសង្គ្រោះអ្នកដែលនៅជាប់គាំង។

គួរបញ្ជាក់ថា ហេតុការណ៍នេះបានកើតឡើងនៅរណ្តៅរ៉ែ Rydultowy ដែលជារណ្តៅរ៉ែធ្យូងថ្មមួយក្នុងចំណោមរណ្តៅរ៉ែចំណាស់ជាងគេនៅប្រទេសប៉ូឡូញ។ ក្រុមហ៊ុន PGG ដែលជាម្ចាស់រណ្តៅរ៉ែនេះ កំពុងសហការយ៉ាងជិតស្និទ្ធជាមួយក្រុមអ្នកជួយសង្គ្រោះ ដើម្បីធានាថា អ្នករុករករ៉ែទាំងអស់ត្រូវបានជួយសង្គ្រោះដោយសុវត្ថិភាព៕